Jasandy ıntellektiniń kómegimen múgedektik anyqtalyp, AÁK taǵaıyndalady – mınıstrlik
ASTANA. KAZINFORM – Elimizde jasandy ıntellektiniń kómegine júginip múgedektikti anyqtamaq. Odan bólek ataýly áleýmettik kómekti de (AÁK) jasandy ıntellekt arqyly taǵaıyndamaq. Jańashyldyq týraly tolyǵyraq Eńbek jáne halyqty áleýmettik qorǵaý vıtse-mınıstri Oljas Anafın aıtyp berdi.
- Múgedektik dárejesin anyqtaýda tıimdilikti arttyrý úshin jasandy ıntellekt múmkindigi engizilmek. Bul úshin medıtsınalyq qorytyndy, saýalnama, derttiń paıda bolýy men basqa da málimet negizinde múgedektik dárejesi men sanatyn avtomatty túrde anyqtaı alatyn mashınalyq oqytý modeli engiziledi. Bul ásirese bastapqy saraptama kezinde mańyzdy, sebebi protsesti jyldamdatady jáne onyń dáldigin arttyrady. Jasandy ıntellektti paıdalaný qyzmetkerge júktemeni azaıtady, mekemeniń áleýetin arttyrady jáne adam faktorynyń áserin qysqartady. Nátıjesinde múgedektikti anyqtaýdyń obektıvtiligi men ashyqtyǵy qamtamasyz etiledi, bul azamattardyń áleýmettik qorǵaý júıesine senimin nyǵaıtady, - dedi Oljas Anafın ortalyq kommýnıkatsııalar qyzmeti alańynda ótken baspasóz máslıhatynda.
Odan bólek, vıtse-mınıstrdiń aıtýynsha, aldaǵy ýaqytta jasandy ıntellekt ataýly áleýmettik kómekti taǵaıyndaý kezinde azamattardyń jalpy aktıvin baǵalaý protsesin avtomattandyrý úshin qoldanylady.
- Bıyl FSM Social mobıldi qosymshasynyń kómegimen 100 myń otbasy tekserildi, olardyń 90 myńnan astamy ótinishke turmystyq jaǵdaıynyń fotosýretterin engizdi. Ótinishter negizinde jasandy ıntellekt modeli oqytyldy. Faktorlardyń mańyzyn taldaý men modeldiń keshendi valıdatsııasy ótkizilgenin, dáldik deńgeıi 90 %-dan joǵaryǵa jetkenin atap ótti. Bul jasandy ıntellekt engizýdi iske asyrýǵa daıyndyǵyn rastaıdy. Keıinnen oqytylǵan model jańa vızýaldy málimetti óńdeýge qoldanylmaq. Baǵalaý nátıjesi aýdandyq komıssııalarǵa ataýly áleýmettik kómek taǵaıyndaý týraly sheshim qabyldaýǵa jiberiledi. Jasandy ıntellektini qoldaný obektıvtilikti arttyryp, protsestiń ashyqtyǵyn jáne sheshim qabyldaý jyldamdyǵyn qamtamasyz etedi dep josparlanǵan, - deıdi ol.
Onyń málimdeýinshe, joǵaryda atalǵan mindet kezeń-kezeńimen júzege asyrylady.
Aıta keteıik, taıaýda Memleket basshysy Qasym-Jomart Toqaev jasandy ıntellekt salasyn retteý tetikterin jetildirýdi taǵy bir mańyzdy mindet retinde aıqyndady.
Eske salaıyq, búginde elimizde eńbek salasyna qatysty saýaldarǵa jasandy ıntellektiniń kómegimen táýlik boıy jaýap beretin ıntellektýaldy chat‑bot jumys istep tur.