Jasandy ıntellektini meńgergen mamandar 62 paıyzǵa kóp tabys tabady

Sonymen qatar jasandy ıntellekt daǵdylaryn talap etetin jumys oryndary eńbek naryǵyndaǵy ózge vakansııalarǵa qaraǵanda áldeqaıda jyldam kóbeıip keledi. Demek, jańa tehnologııany meńgerý eńbek naryǵyndaǵy mańyzdy artyqshylyqqa aınalyp otyr.

Jasandy ıntellekt búginde tek suraqqa jaýap berip, mátin jazýmen shektelmeıdi. Ol dárigerlerge aýrýdy anyqtaýǵa kómektesip, óndiristegi jumysty jeńildetip, kásiporyndardyń ýaqytyn únemdeýge múmkindik beredi. Alaıda daıyn qosymshany paıdalaný bir bólek te, ony naqty kásibı mindetterdi sheshýge qoldaný bir bólek.

Qazaqstanda osy baǵytta AI Research Labs kompanııasy jumysyn bastamaq. Joba mamandardy jasandy ıntellektini tájirıbede qoldanýǵa úıretýdi kózdeıdi. Ýnıversıtetterde zerthanalar ashý, kásiporyn qyzmetkerlerin oqytý jáne óńirlerde bilim berý baǵdarlamalaryn uıymdastyrý josparlanǵan.

Jasandy ıntellektini kásibı deńgeıde meńgeretin mamandar jetkilikti me? Kásipker shyǵynyn azaıtý, muǵalim sabaq sapasyn arttyrý nemese dáriger jumysyn jeńildetý úshin bul tehnologııany qalaı qoldana alady? Qazaqstandyq kompanııalar jańa tehnologııany engizýge qanshalyqty daıyn? Bul týraly AI Research Labs kompanııasynyń bas dırektory Jánibek Serqulov Jibek Joly telearnasynyń «Búgin.LIVE» baǵdarlamasynda aıtyp berdi.

Jánibek Serqulovtyń aıtýynsha, AI Research Labs úsh baǵytta jumys isteıdi. Birinshisi – ýnıversıtetterde qoldanbaly jasandy ıntellekt zerthanalaryn ashý. Ekinshisi – kompanııa qyzmetkerlerin tehnologııany jumys barysynda paıdalanýǵa úıretý. Úshinshisi – jeke tulǵalarǵa arnalǵan bilim berý baǵdarlamalary.

– Bizdiń maqsatymyz – jasandy ıntellektini tájirıbede qoldanýdy úıretý. Ýnıversıtetterde stýdentter men oqytýshylarǵa arnalǵan zerthanalar ashyp, aýqymdy jobalar ázirleýdi kózdep otyrmyz. Qazir Astana IT ýnıversıtetimen jumys istep jatyrmyz. Sondaı-aq Máskeý memlekettik ýnıversıtetimen kelisimge qol qoıdyq. Ekinshi baǵytta kásiporyndardyń basshylary men qyzmetkerlerine kómektesemiz. Úshinshi baǵyt jeke tulǵalarǵa arnalǵan, – dedi Jánibek Serqulov.

Onyń aıtýynsha, kompanııa ýnıversıtetterde beriletin bilim men eńbek naryǵynyń suranysyn jaqyndastyrýdy kózdeıdi. Ol úshin stýdentter ekinshi kýrstan bastap kásiporyndardyń naqty mindetterine saı jobalar ázirleýge qatysady.

– Biz naryqtyń suranysyn zerttep, stýdentterdi kompanııalardyń naqty qajettilikterine saı oqytýdy josparlap otyrmyz. Stýdentter oqytýshylarmen birge kásiporyndarǵa qajet jobalardy ázirleıdi. Olarǵa arnaıy kýratorlar kómektesedi. Bizdiń mindetimiz – ýnıversıtet pen naryqtyń arasyn jalǵaý. Kompanııalardyń suranysy oqý protsesine tikeleı yqpal etýi kerek, – dedi ol.

Kompanııa oqytýshylardyń biliktiligin arttyrýǵa da kóńil bóledi. Sebebi bir oqytýshynyń jańa tehnologııany meńgerýi onyń bilimin kóptegen stýdentke jetkizýge múmkindik beredi. Osy maqsatta Astana IT ýnıversıtetinde jeksenbilik semınarlar ótkizilip jatyr. Oǵan IT mamandarymen qatar, lıngvıster, tarıhshylar, professorlar men basqa da sala ókilderi qatysady.

– Semınarlarǵa tek IT mamandary emes, basqa baǵyttaǵy oqytýshylar da keledi. Ýnıversıtetter men kolledjderdiń mamandary jasandy ıntellektini óz salasynda qoldanýǵa qyzyǵýshylyq tanytyp otyr. Mundaı kezdesýlerge kez kelgen adam qatysa alady, – dedi kompanııa basshysy.

Jasandy ıntellektini kásiporyn jumysyna engizgende derekterdiń qupııalyǵy men qaýipsizdigi de mańyzdy. Ásirese kompanııalardyń ishki aqparaty men jeke derekterin óńdeý kezinde olardy qorǵaý talaptary saqtalýy kerek. Jánibek Serqulovtyń aıtýynsha, zerthanalarda derekterdi qaýipsiz óńdeý jáne stýdentterge usyný tásilderine de nazar aýdarylady.

Kompanııa aldaǵy ýaqytta óńirlerge baryp, basqa joǵary oqý oryndarymen de jumys isteýdi josparlap otyr. Bul bastama jasandy ıntellektini tek iri qalalarda emes, elimizdiń ózge óńirlerinde de tájirıbede qoldanýǵa múmkindik bermek.

Jasandy ıntellektini jaı qoldaný men ony kásibı deńgeıde meńgerýdiń aıyrmashylyǵy – tehnologııany naqty mindetterdi sheshýge beıimdeı bilýde. AI Research Labs osy daǵdyny stýdentterge, oqytýshylarǵa, kásiporyn qyzmetkerlerine jáne jeke tulǵalarǵa úıretýdi maqsat etip otyr.

Buǵan deıin astanalyq stýdenttiń aýylsharýashylyq dronyn oılap tapqany týraly jazǵan edik.