Jasandy ıntellektini qoldaný: 300 myńǵa jýyq pedagog tegin kýrstan ótti

ASTANA. KAZINFORM - QR Oqý-aǵartý mınıstrliginiń «Órleý» biliktilikti arttyrý ulttyq ortalyǵy pedagogterdiń tsıfrlyq quzyrettiligin arttyrý baǵytyndaǵy jumysyn jalǵastyryp jatyr. Sońǵy eki aıda oqý protsesinde jasandy ıntellektini tıimdi paıdalaný boıynsha onlaın kýrstan elimizdiń barlyq óńirinen 300 myńǵa jýyq pedagog ótti.

Oqý-aǵartý mınıstrligi málimetinshe, baǵdarlama halyqaralyq tájirıbege negizdelip, qazaqstandyq bilim berý júıesiniń erekshelikterine beıimdele ázirlengen. Kýrstyń negizgi maqsaty — pedagogterdi zamanaýı tsıfrlyq quraldardy tıimdi qoldanýǵa úıretý jáne bilim berý sapasyn arttyrý.

– Jasandy ıntellekt muǵalimdi almastyrmaıdy, kerisinshe onyń kómekshisine aınalady. Tsıfrlyq tehnologııalardy meńgergen ustaz oqý úderisin jandandyryp, ýaqytyn únemdep, oqýshylardyń qyzyǵýshylyǵyn arttyra alady, - deıdi Orta bilim berý komıteti tóraǵasynyń orynbasary Zeınep Mahsýtova.

Kýrs barysynda muǵalimder jasandy ıntellekt quraldaryn tıimdi ári etıkalyq turǵydan durys qoldaný daǵdylaryn meńgerdi. Atap aıtqanda, oqý materıaldaryn, testilerdi, ıllıýstratsııalar men sabaq josparlaryn jyldam ári sapaly ázirleýdi úırenedi.

Tegin onlaın-baǵdarlama «Órleý» MOOC platformasynda ornalastyrylǵan jáne Qazaqstandaǵy barlyq pedagogter úshin qoljetimdi. Qatysýshylar oqý materıaldaryn ózderine yńǵaıly ýaqytta meńgerip, kýrsty aıaqtaǵany týraly kýálik ala alady.

Kýrsqa qatysý úshin reg.orleu.edu.kz saıty arqyly tirkelý qajet.

Aıta keteıik, halyqaralyq «Qazaq tili» qoǵamy OpenAI-men ChatGPT-diń qazaqsha qyzmet sapasyn birlesip arttyrýǵa kelisti.