Jasandy ıntellektini qarqyndy damytýda ShYU álemde kósh bastaı alady — Prezıdent

ASTANA. KAZINFORM — Budan keıin Qasym-Jomart Toqaev joǵary tehnologııalar jáne tsıfrlandyrý salasyndaǵy yntymaqtastyqty jandandyrý qajettigine nazar aýdardy, dep habarlaıdy Aqordanyń baspasóz qyzmeti.

Onyń aıtýynsha, bul isti keıinge qaldyrýǵa bolmaıdy. 2033 jylǵa qaraı jasandy ıntellekt naryǵynyń kólemi 5 trıllıon dollarǵa jetip, osy sektordyń álemdik tehnologııa ındýstrııasyndaǵy úlesi 30 paıyzǵa deıin ulǵaıady.

— Basqa strategııalyq baǵyttarǵa qaraǵanda atalǵan salanyń damýy óte jyldam. Jasandy ıntellektini qarqyndy damytýda ShYU álemde kósh bastaı alady dep esepteımin. Sondyqtan Qytaıdyń Jasandy ıntellekt salasyndaǵy yntymaqtastyq boıynsha jahandyq uıym qurý týraly usynysyn tolyq qoldaımyz. Mundaı óte mańyzdy iske qomaqty úles qosýǵa daıynbyz. Qazaqstan tsıfrlandyrýdyń barlyq spektri boıynsha yntymaqtastyqty arttyrýdy, sonyń ishinde ekonomıkanyń naqty sektorlaryna, densaýlyq saqtaý isine, kólik-logıstıka salasyna, qalalardy basqarý júıesine «aqyldy sheshimderdi» engizýdi qýattaıdy, — dedi Prezıdent.

Qasym-Jomart Toqaev osy baǵyttaǵy naqty qadam retinde ShYU-nyń jasandy ıntellekt boıynsha turaqty sarapshylar forýmyn ótkizýdi usyndy.

— Alǵashqy kezdesýdi Astanada Digital Bridge bedeldi forýmy aıasynda ótkizýge daıynbyz. Budan bólek, elimiz 2027 jyly «ShYU-nyń ekonomıka qyzmetindegi jasandy ıntellekt» taqyrybynda joǵary deńgeıdegi konferentsııa uıymdastyrýǵa nıetti. Al kelesi jyly Uıym elderi buqaralyq aqparat quraldarynyń ókilderimen birge jańa tehnologııalyq dáýirdegi aqparattyq saıasat problemalaryn talqylaýǵa ázirmiz, — dedi Prezıdent.

Buǵan deıin Memleket basshysy ınvestıtsııalyq jobalardy súıemeldeıtin ShYU Keńsesin qurýdy usyndy.

Sondaı-aq Prezıdent «TransAltaı dıalogy» bastamasyna qoldaý bildirdi.