Jasandy ıntellektini engizýde kemshilikke jol bermeý kerek – senator

ASTANA. KAZINFORM – Sot júıesi jáne quqyq qorǵaý organdary qyzmetinde jasandy ıntellektini engizý qanshalyqty qaýipsiz? Tıimdi me? Sol sııaqty sala mamandarynyń jumysyn qanshalyqty jeńildetedi? Osy jáne ózge de saýalǵa Senattyń Konstıtýtsııalyq zańnama, sot júıesi jáne quqyq qorǵaý organdary jónindegi komıtetiniń tóraǵasy Nurlan Beknazarov jaýap berdi.

- Sýdıalardyń IX sezinde Memleket basshysy sot rásimderin ońaılatý óte mańyzdy, al onyń sheshimin tabý joldarynyń ishinde ınnovatsııalyq tehnologııalar men jasandy ıntellektti engizý arqyly múmkin bolatynyna nazar aýdardy. Búginde jasandy ıntellektti engizý quqyq qorǵaý salasynda jáne sot qyzmetiniń sapasyn arttyrýǵa yqpal etetini sózsiz. Mysaly, jasandy ıntellekt kelesideı salalarda qoldanylýy múmkin, zamanaýı júıeler úlken kólemdegi aqparatty tez óńdeý jáne taldaý arqyly zańsyzdyqtardy jyldam anyqtaı alady. Intellektýaldy beınebaqylaý jáne beınelerdi taný júıeleri izdeýde júrgen qylmyskerlerdiń túrin, kólik nómirin jáne kúdikti zattardy tanyp, anyqtap bere alady, - dedi Nurlan Beknazarov Senat qabyrǵasynda jasandy ıntellektini quqyq qorǵaý organdary qyzmetinde qoldaný taqyrybyna arnalǵan dóńgelek ústelde.

Sondaı-aq senator jasandy ıntellektini sot sheshimin qabyldaýda kómek quraly retinde, ıaǵnı sot protsesin avtomattandyrýǵa paıdalaný jaǵyn aıtty.

- Jasandy ıntellekt negizindegi baǵdarlamalyq keshender quqyq normalaryn jáne aldyńǵy sot sheshimderin taldap, sýdıalarǵa uqsas ister boıynsha úlgilerdi tabýǵa kómektesedi, bul sot tájirıbesiniń birkelkiligine yqpal etedi jáne sheshim shyǵarýdy tezdetedi. Jasandy ıntellekt sot isin júrgizýdiń ádettegi rásimdi avtomattandyrýǵa múmkindik beredi, kelip túsken isterdi bólýden jáne talap-aryzdardy elektrondyq qabyldaýdan bastap úlgilik qujattardy daıyndaýǵa deıin múmkindik beredi, - deıdi ol.

Onyń aıtýynsha, qazir barlyq salada jasandy ıntellekt engizilip jatyr. Biraq qaýipsizdik tetikterin esten shyǵarmaý qajet.

- Degenmen jasandy ıntellektti engizý aldynda yqtımal táýekelderdi aldyn ala baǵalap, ólshep engizý qajet. Sondyqtan jasandy ıntellektti engize otyryp, azamattardyń konstıtýtsııalyq quqyǵynyń qatań saqtalýyn, jeke derekterdi qorǵaýdy jáne algorıtmderde qandaı da bir kemshilikke jol bermeý kerek. Biz tsıfrlyq ınnovatsııalardy engizý qajet bolǵan jaǵdaıda zańnamalyq bazany da jetildiremiz, - dep tolyqtyrdy Senat depýtaty.

Qazir Senattyń Konstıtýtsııalyq zańnama, sot júıesi jáne quqyq qorǵaý organdary jónindegi komıtetinde «Jasandy ıntellekt: onyń tehnologııalaryn quqyq qorǵaý jáne sot qyzmetine engizý jáne qoldaný» taqyrybynda dóńgelek ústel ótip jatyr. Jıynǵa Senat depýtattary, quzyrly organdardyń ókilderi men sala mamandary qatysty.

Jańa ǵana Májilis jasandy ıntellekt týraly úsh zańnyń jobasyn maquldady.