Jasandy ıntellektini damytý jónindegi keńestiń kelesi otyrysynda JI-di ónerkásipke engizý máselesi qaralmaq
ASTANA. KAZINFORM - Qasym-Jomart Toqaev Jasandy ıntellektini damytý jónindegi keńestiń kelesi otyrysynda jasandy ıntellektini ónerkásipke engizý máselesin qarastyrýdy usyndy.
Memleket basshysy jasandy ıntellektiniń strategııalyq mańyzy modeldiń aýqymyna qaraı emes, kerisinshe ekonomıkanyń naqty sektorymen qanshalyqty úılesim tapqanyna baılanysty anyqtalatynyn aıtty.
– Shyn máninde, paradıgmalar túbegeıli ózgerip jatyr. Jasandy ıntellektini naqty ýaqyt rejıminde paıdalaný ósimniń basty faktory sanala bastady. Sondyqtan bizge derekterdi, úderister men adamdardy biriktiretin birtutas júıe qurý qajet. Osyndaı negiz qalyptasqanda ǵana pılottyq sheshimdermen shektelmeı, jasandy ıntellektini ekonomıkanyń barlyq sektoryna engizýge jol ashylady. Jahandaǵy tehnologııalyq jarysta birde bir el óz betinshe jasandy ıntellekt áleýetin tolyq paıdalana almaıdy. Jasandy ıntellektini damytý jónindegi keńes, eń aldymen, ekonomıka jáne tsıfrlyq platforma salasynda kelisilgen tásilder ázirlep, ozyq tájirıbelermen almasý úshin quryldy. Osyǵan oraı Keńestiń kelesi otyrysynda jasandy ıntellektini ónerkásipke engizý máselesin qarastyrý qajet dep oılaımyn. Óıtkeni óndiris – qosylǵan quny joǵary ónim óndiretin jáne jańa tehnologııany synap kóretin eń basty alań. Bul oraıda taý-ken kesheni, energetıka, agroónerkásip sektory, logıstıka salalaryndaǵy ónimdilikti arttyrý, shyǵyndy azaıtý jáne basqarý tıimdiligin jetildirý máselelerine basa mán berýdi usynamyn. Indýstrııalyq derekterdi damytyp, óndiristiń tsıfrlyq telnusqalaryn engizý, sondaı-aq protsesterdi jappaı avtomattandyrý arqyly biz strategııalyq maqsattardyń pikirtalas kúıinde qalmaı, naqty iske ulasýyna múmkindik jasaımyz, – dedi Prezıdent.
Jıynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev, Ulttyq bank tóraǵasy Tımýr Súleımenov, Sinovation Ventures jáne 01.ai bas dırektory Lı Kaı Fý, Cambrian Futures bas dırektory Olaf Dj. Grot, «Samuryq-Qazyna» ulttyq ál-aýqat qorynyń basqarma tóraǵasy Nurlan Jaqypov, Abý Dabıdegi Halıfa ǵylym jáne tehnologııa ýnıversıtetiniń professory Merýan Debba, Tıýrıng syılyǵynyń laýreaty Djon Hopkroft, BUU-nyń «Igilikke arnalǵan JI» bastamasy atqarýshy keńesiniń tóraǵasy Ál Mazrýı Ebtesam jáne Oxford Insights bas dırektory Rıchard Stırlıng sóz sóıledi.
Osyǵan deıin JI tıimdi qoldaný úshin derekterge baǵdarlanǵan basqarý modelin engizý kerektigin aıtqan bolatyn.
https://kaz.inform.kz/news/zhitimd-koldanu-ushn-derekterge-bagdarlangan-baskaru-modeln-engzu-kerek-memleket-ddb11060
