Jasandy ıntellektimen jabdyqtalǵan qazaqstandyq «aqyldy kaska» halyqaralyq kórmede tanystyryldy
MINSK. KAZINFORM — Qazaqstandyq ázirleýshilerdiń óndiristegi qaýipsizdikke arnalǵan «aqyldy kaskasy» Mınskidegi «INNOPROM» kórmesinde usynyldy. Bul týraly Úkimettiń baspasóz qyzmeti habarlady.
Mınskidegi «INNOPROM.Belarýs» halyqaralyq kórmesinde Qazaqstandyq ázirleýshiler óndiristegi eńbek qaýipsizdigi men tıimdiligin arttyrýǵa baǵyttalǵan sheshim usyndy — Best Vision Technologies kompanııasy «aqyldy kaska» serııalyq óndirisin jolǵa qoıdy. Mundaı ınnovatsııalardy engizý Memleket basshysynyń tapsyrmasy boıynsha jasandy ıntellektini damytý jáne ozyq tehnologııalardy, onyń ishinde ónerkásip pen eńbek qaýipsizdigin qamtamasyz etý júıesine engizý boıynsha júrgizilip jatqan jumystar sheńberinde júzege asyrylyp otyr.
Ázirlemeniń negizi — qarapaıym kaskaǵa bekitilgen arnaıy qurylǵy. Ol kameramen, dınamıkpen jáne mıkrofonmen jabdyqtalǵan. Bul menedjerge naqty ýaqyt rejıminde jumys ornynda qyzmetkermen bolyp jatqan barlyq nárseni kórýge jáne estýge, sondaı-aq olarmen eki jaqty baılanys ornatýǵa múmkindik beredi. Óndiristegi lokalızatsııa deńgeıi 63%-ǵa jetetin qurylǵy ornalasqan jerdi baqylaýǵa arnalǵan GPS modýlimen jabdyqtalǵan jáne Wi-Fi ári uıaly baılanys arqyly jumys isteıdi.
Sonymen qatar «aqyldy kaskaǵa» jasandy ıntellektini ıntegratsııalaý jumystary aıaqtalýda. Tehnıkalyq «kórýdi» qoldana otyryp, jasandy ıntellekt kameradan beıne aǵynyn taldaıdy jáne qaýipsizdik erejeleriniń buzylýyn avtomatty túrde anyqtaıdy.
— Eger qyzmetker kaskasyz, qolǵapsyz nemese jumys kıiminsiz jumys istese, júıe ony jazyp alady da dereý dıspetcherge habarlama jiberedi. Bul júıe jumys oryndaryndaǵy qaýipsizdikti baqylaýǵa, eńbek ónimdiligin arttyrýǵa, óndiris mádenıetin jaqsartýǵa múmkindik beredi jáne qyzmetkerler men basshylyq arasyndaǵy baılanysty jeńildetedi, — dep atap ótti kompanııa dırektory Sáken Sadyqov.
Jaqyn arada kompanııa tolyq ıntegratsııalanǵan kaska shyǵarýdy jolǵa qoıýdy jáne naqty ýaqyt rejıminde óndiristik operatsııalardy oryndaý kezinde qyzmetkerlerge keńes bere alatyn daýystyq kómekshini ázirleýdi josparlap otyr.
Aıta ketelik Mınskide qazaqstandyq «aqyldy» jabdyqtar men robot júıeleri tanystyrylǵan edi.