Jasandy ıntellektige sanany engizýge bolady, biraq táýekel bar – sarapshy

ASTANA. KAZINFORM – JI-ge sanany qalyptastyrýǵa baǵyttalǵan eksperıment tehnıkalyq turǵydan múmkin, alaıda adamdardyń neırojelilik tulǵalarǵa táýeldi bolý qaýpin kúsheıtedi. Bul týraly Novosibir memlekettik ýnıversıteti JI ortalyǵynyń jetekshi ǵylymı qyzmetkeri Evgenıı Pavlovskıı TASS agenttigine aıtty.

Ótken aptada «ıAndeks» kompanııasy jasandy ıntellektige sananyń damý múmkindigin zertteýge arnalǵan eksperıment bastap jatqanyn habarlaǵan edi. Maqsat – neırojeliniń adamdardyń mátinderinen tys, ózine tán turaqty pikir men jeke ustanym qalyptastyra alatynyn nemese almaıtynyn anyqtaý.

«JI-ge tulǵalyq qasıet berý – qol jetkizýge bolatyn nárse. Jasandy ıntellekt óz qalaýyn, óz talǵamyn qalyptastyra alady. Bul tym alystaǵy sharýa emes. Biraq muny jasaý qajet pe? Basty suraq osy. Adamdar belgili bir tulǵalyq sıpatqa ıe kómekshilerdi jıi qoldanatyn bolady. Alaıda bul adamdy adamnan alystatady, tehnologııaǵa, elektr qýatyna táýeldi etedi», – dedi Pavlovskıı.

Sarapshynyń aıtýynsha, taǵy bir qaýip – sanaly JI baqylaýdan shyǵyp ketýi múmkin.

«Bul týraly kóp aıtyldy. Eger ol sanaly sýbekt bolsa, onda avtonomdy sheshim qabyldaýǵa umtylady, tipti qaýipti áreketter jasaýǵa barýy yqtımal. Eger bizge shynymen sananyń tabıǵatyn zertteý qajet bolsa, onda bul qubylysty aldymen janýarlardaǵy sanamen baılanystyra otyryp, JI kómegimen zerttegen durys», – dedi ol.

Pavlovskııdiń pikirinshe, mundaı eksperımenttiń jaǵymdy jaǵy – ózindik sana fenomenin zertteýge jáne adam sanasyn tereńirek túsinýge múmkindik beredi.

«JI-de sanany damytýǵa qatysty kez kelgen zertteý etıkalyq turǵydan óte muqııat baqylaýdy talap etedi. Mundaı ǵylymı jumystardy jarııalaýǵa ruqsat berý de qatań rettelýi tıis, sebebi olar belgili bir zııan keltirýi múmkin», – dep túıindedi ol.

Aıta keteıik, Qyrǵyzstanda júrgizýshi kýáligine arnalǵan emtıhandy jasandy ıntellekt qabyldaıdy.