Jasandy ıntellektige negizdelgen otandyq startap Tokıodaǵy forýmda tanystyrylmaq
ASTANA. KAZINFORM — Otandyq startap joba Japonııa astanasy Tokıoda ótetin dúnıejúzilik buildingSMART forýmynda kópshilik nazaryna usynylmaq. Jobalyq qujattamany jasandy ıntellekt arqyly tekseretin osy startap qurylys salasyndaǵy aýqymdy jumysty jeńildetýge arnalǵan.
Atap aıtqanda, buildingSMART — sáýlet, ǵımarattar men ınfraqurylymdy jobalaý, ınjenerlik qamtamasyz etý, ǵımaratty salý jáne paıdalaný salalaryna arnalǵan ashyq tsıfrlyq standarttardy ázirleıtin jáne ilgeriletetin jetekshi halyqaralyq alıans. 2026 jylǵy 6–8 qazan aralyǵynda Tokıoda ótetin osy halyqaralyq sammıtte qazaqstandyq AIDAN tehnologııalyq startapy boıynsha «Engineering Trust: openBIM damýynyń kelesi kezeńi» taqyrybynda baıandama jasalady. Baıandamada ınjenerlik sheshimderdegi jasandy ıntellektige degen senimdi qalyptastyratyn bes qaǵıdat — túsindirmelilik, adamnyń baqylaýyn saqtaý, tolyq aýdıt, ashyq standarttar men jergilikti normalardyń úılesimi.
— Qazaqstan aqparattyq modeldeýdi mindetti túrde engizýge kóship jatyr. Jobalardyń sáıkestigin tekserý protsesine avtomattandyrylǵan tártip engizilip jatyr. Biz bul jaǵdaıǵa óz jobalarymyzdy ázirlegen kezde erekshe nazar aýdardyq. Sondyqtan Tokıodaǵy sammıtte halyqaralyq standarttardy belgileıtin mamandarmen birlesken sheshimdi talqylap, kásibı qaýymdastyqqa ortaq tetikti qarastyrýdy usynbaqpyz, — dedi AIDAN kompanııasynyń bas dırektory Mádı Ábenov.
Qazir Qazaqstannyń qurylys salasy tsıfrlyq modeldeýge ótip jatyr. QR Ónerkásip jáne qurylys mınıstriniń 2026 jylǵy 19 naýryzdaǵy № 114 buıryǵyna sáıkes, qurylys nysandaryn qurý jáne paıdalaný kezinde aqparattyq modeldeý tehnologııasyn qoldaný mindetti sanalatyn nysandardyń tizbesi bekitildi. Bul talap oqýshylar sany 600 jáne odan da kóp mektepterge, avıatsııalyq ınfraqurylym nysandaryna, temirjol jáne avtomobıl joldarynyń tonnelderine, metro júıelerine, uzyndyǵy keminde 100 metr bolatyn kópirlerge jáne biregeı qurylys jobalaryna qoldanylady. Bul óz kezeginde jobalaýshylardan jumys isteýdiń jańa tásilin meńgerýdi, sondaı-aq baqylaýdyń jańa aýqymyn ıgerýdi talap etedi.
AIDAN-nyń operatsııalyq dırektory Jasulan Ábishevtiń sózine qaraǵanda, qazirgi qoldanystaǵy servıster faıldardyń tolyqtyǵyn tekseredi. Al AIDAN platformasy jobaǵa qatysty materıaldardyń mazmunyn tekseredi, ıaǵnı faıl mazmunynyń tıisti qujatqa sáıkestigin anyqtap, qujattar arasynda qaıshylyqtardyń joqtyǵyn aıqyndaıdy. Platforma árbir eskertýdi naqty dáleldermen kórsetip otyrady. Bul óz kezeginde ınjenerlerdiń jumysyn jeńildetedi.
Búginde platformada birneshe qyzmet jumys isteıdi. AIDAN Review jobalyq jáne ruqsattyq qujattamany normatıvtik talaptarǵa sáıkestikke tekseredi. Aidan Code — Qazaqstannyń qoldanystaǵy normatıvteri boıynsha suraqtarǵa naqty tarmaqshaǵa silteme jasap jaýap beretin assıstent. Aidan Curator qurylys praktıkasy men jobalaý kezeńderine qatysty suraqtarǵa keńes beredi.
Aıta keteıik, jaqynda Qazaqstan men Koreıa statıstıkada jasandy ıntellekt pen Big Data-ny birge damytatynyn jazǵan edik.
Sonymen qatar Alataý qalasynda jasandy ıntellekt pen ozyq tehnologııalar shoǵyrlanady.
