Jasandy ıntellektiden qandaı qaýip bar
ASTANA. KAZINFORM – Jasandy ıntellekt teris pıǵyldy adamnyń qolyna tússe, zor qaýip tóndiredi. IT-sarapshylar JI-den qandaı qater kelýi múmkin ekenin, odan qalaı qorǵaný kerektigin aıtty.
— ChatGPT-di aıtar bolsaq, kóp adam ony dosy sekildi kóredi. Jaı áńgime aıtý úshin qoldanady. Biraq siz «ol dostyń» bárin esine saqtap alatynyn umytpaýyńyz kerek. Bolashaqta da ol sizdiń dosyńyz bolyp qala bere me degendi oılana júrý kerek. Sondyqtan onymen áńgimeleskende onsha tanys emes adammen restoranda otyryp sóıleskendeı araqashyqtyq saqtap sóılesseńiz, eshqandaı qaýip joq. Biraq óziń jaıly tym jeke málimetterdi aıtýǵa bolmaıdy. Aqshany qaıda saqtaısyz, qandaı álsiz tustaryńyz bar, ondaıdy kóp aıta bermegen durys, - deıdi Astana Hub bas dırektorynyń keńesshisi, startaptar men tehnologııalardy damytý salasyndaǵy sarapshy Danabek Qalıajdarov.
Maman jasandy ıntellekt bás tigýge áýes adamdardy ózi anyqtap alyp, oǵan sondaı jarnamalardy usynýy múmkin ekenin aıtady. Mundaı jaǵdaıda JI «myna jerden kredıt alyp, myna oıynǵa bás tik» dese, onsyz da qumar oıynǵa táýeldiligi bar adam onyń aıtqanyn oryndap qoıýy yqtımal.
IT-kásipker, IT-sarapshy jáne mentor Azat Esenov JI-diń adamǵa qaýipti taǵy bir qyryn aıtty.
— Bızneste jasandy ıntellekt baılanys ortalyqtarynyń qyzmetine engizilgen. Buryn maǵan bireý qońyraý shalsa, men birneshe sekýndta-aq onyń adam álde robot ekenin túsine qoıatynmyn. Qazir de maǵan spam-qońyraýlar túsip turady. Keıbireýiniń artynda bir dybystary, kidirisi bolady, tipten onyń jasandy ıntellekt ekenin ańǵarmaı qalasyń. Osy múmkindikti alaqtar qoldana alady. Buny birinshi qaýip dep aıtar edim, - deıdi maman.
Sondaı-aq, ol mundaı jaǵdaıda qoldanylatyn eń tıimdi laıfhakty da atap ótti.
— Qońyraýdy jasandy ıntellekt shalyp tur dep kúdiktenseńiz, birden «qazaqsha sóıleńiz» dep aıtyńyz. Sonda ol baılanysty úze qoıady. Biraq bul tásil de ýaqytsha ǵana jaramdy. Aldaǵy birneshe jylda bul kedergini de olar joıa alady dep oılaımyn, - deıdi sarapshy.
Aıta keteıik, Azat Esenov — Upwork halyqaralyq platformasynda eki túrli komandamen Top Rated statýsyn alǵan jalǵyz qazaqstandyq.
Osyǵan deıin jasandy ıntellekt qoldanatyn kásiporyndardy memlekettik qoldaý sharalary ázirlengeni týraly habarladyq.