Jasandy ıntellekt jýrnalısterdi almastyra almaıdy — Aıgúl Múkeı
ASTANA. KAZINFORM — Bıyl BAQ qyzmetkerleriniń kúni qarsańynda Memleket basshysy medıa salasynyń birqatar ókilin memlekettik nagradalarmen marapattady. Olardyń biri — Jibek Joly telearnasynyń júrgizýshisi Aıgúl Múkeı.
— «Parasat» ordeni — atqarylǵan jumysqa berilgen baǵa. Alǵash efırge shyqqanyma bıyl 35 jyl tolypty. 1991 jyly Aqmolada jekemenshik telearnada eńbek jolymdy bastadym. Keıin «Habar» arnasynda «Bıznes habar» baǵdarlamasyn júrgizdim. Osy ýaqyt ishinde salanyń ystyq-sýyǵyn kórip, mol tájirıbe jınadym. Qazir de túrli formattaǵy baǵdarlamalardy júrgizip, kásibı turǵyda shyńdalyp kelemin, — dedi Aıgúl Múkeı Jibek Joly telearnasynyń «Búgin Live» baǵdarlamasynda.
Tájirıbeli jýrnalıstiń aıtýynsha, ýaqyt ótken saıyn telejúrgizýshige qoıylatyn talap ózgerip jatyr.
— Buryn kórermen úshin eń aldymen júrgizýshiniń daýysy mańyzdy bolsa, qazir shynaıylyq aldyńǵy orynǵa shyqty. Búgingi kúnniń trendi osy. Budan bólek, salada qalyptastyratyn ustazdyń róli erekshe. Meniń ustazym — memleket qaıratkeri Kamal Smaıylov. Osyndaı jetistikke jetýime sol kisiniń tálimi zor yqpal etti, — dedi ol.
Aıgúl Múkeı qazirgi aýdıtorııanyń aqparatqa degen suranysy ózgergenine de toqtaldy.
— Kórermenge haıp emes, sarapshylyq kózqarasqa negizdelgen obektıvti aqparat qajet. Saraptamalyq jýrnalıstıkanyń róli burynǵydan da mańyzdy, — dedi telejýrnalıst.
Baǵdarlama barysynda tsıfrlandyrý dáýirindegi jýrnalıstıkanyń bolashaǵy men jasandy ıntellektiniń yqpaly talqylandy.
— Qazir jelide jasandy ıntellekt jasaǵan ánder de, beınerolıkter de kóbeıdi. Biraq olardyń eshqaısysy adamnyń emotsııasyn, sezimin tolyq jetkize almaıdy. Bolashaqta jasandy ıntellekt salany ózgertetini sózsiz. Alaıda ol óz isiniń mamandaryn almastyra almaıdy, — dedi Aıgúl Múkeı.
Aıta keteıik, kásibı merekede óńirdegi BAQ qyzmetkerleri baspanaly boldy.
