Jasandy ıntellekt jýrnalıst jumysyn jeńildetýi kerek - Qanat Ysqaqov

ASTANA. KAZINFORM – Jasandy ıntellekt jýrnalıstıkany almastyrmaı, tek jýrnalıst jumysyn jeńildetýi kerek. Bul týraly Astana Media Week 2025 aıasynda ótken pikirtalasta Mádenıet jáne aqparat vıtse-mınıstri Qanat Ysqaqov málimdedi.

— Biz jasandy ıntellektini tek taldaý, tereńdik pen mazmun sapasyn jaqsartý maqsatynda ilgeriletemiz. Alaıda jańa tehnologııalardy asa muqııat jáne dál qoldanýymyz qajet, — dedi ol.

Mınıstrlik jasandy ıntellektini quqyqtyq turǵydan retteý negizin qalap jatyr. Onyń ishinde aldaǵy ýaqytta qabyldanatyn JI týraly zań da bar. Sonymen qatar, úkimet medıa óndirisinde neırojelilerdi qoldanýdy yntalandyrýdy josparlap otyr, biraq bul tek analıtıkalyq tereńdik pen mazmundy arttyrǵan jaǵdaıda ǵana júzege asyrylmaq.

Euronews telearnasynyń halyqaralyq tilshisi Denıs Lokte de medıadaǵy AI júıelerdiń damýyna toqtalyp ótti. Onyń aıtýynsha, ChatGPT – eń tanymal quraldardyń biri bolǵanymen, kásibı medıanyń qajettilikterine árdaıym saı kele bermeıdi.

— ChatGPT-di qoldaný eń durys sheshim emes. Qazir Eýropadaǵy birneshe iri medıa ózderiniń jasandy ıntellekt júıelerin jasap jatyr. Mysaly, Shvetsııanyń ulttyq teleradıokorporatsııasy aýdıtorııaǵa beıimdelgen kontentti taldaý men jetildirý úshin arnaıy JI júıesin iske qosty, — dep túıindedi Lokte.

Aıta keteıik, buǵan deıin OpenAI kiristirilgen ChatGPT bar jeke braýzeri jaıly jazǵan edik.

Kamıla Múlik