Jasandy ıntellekt jobalarynyń biryńǵaı pýlyn qalyptastyrý qajet — Premer-mınıstr
ASTANA. KAZINFORM — Jasandy ıntellektini jappaı engizý úshin shashyrańqy derekterdi retke keltirý qajet. Bul týraly Úkimet otyrysynda Premer-mınıstr Oljas Bektenov málim etti.
— Qazaqstan ınvestorlar men ІT-mamandar, sonyń ishinde sheteldik mamandar úshin de tartymdy bolýy kerek. Sondaı-aq jasandy ıntellektini jappaı engizý úshin shashyrańqy derekterdi retke keltirý, bızneske memlekettik derekter qorynyń qoljetimdi bolýy jáne olardy paıdalanýdyń biryńǵaı standarttaryn engizý máselelerin sheshý qajet. Jasandy ıntellekt mınıstrligine ádisnamalyq bazany qalyptastyrýdy aıaqtap, salalyq «data-lake»-ter qurýǵa basymdyq berýdi tapsyramyn. Jasandy ıntellektini tolyqqandy engizý sapaly ári tsıfrlanǵan derekterdiń bolýyna tikeleı baılanysty. Buǵan deıin barlyq salada derekterdi tsıfrlandyrý deńgeıin arttyrý týraly tapsyrma berilgen bolatyn. Sondyqtan jumysty jandandyryp, derekter qoryn turaqty negizde tolyqtyryp otyrý qajet. Bul — jasandy ıntellektiniń salalyq úlgilerin damytýdyń negizgi sharty, — dedi Oljas Bektenov.
Sonymen qatar Úkimet basshysy jasandy ıntellekt salasynda memlekettik bastamalarmen ǵana shektelip qalmaý kerek ekenin atap ótti. Jeke sektor men onyń bastamalaryn belsendi túrde tartý maqsatynda ekonomıkalyq yntalandyrý quraldaryn ázirleý qajet.
— Sheshimderdi keńinen taratý úshin bızneste tehnologııalyq ıkemdilik, quzyrettilik jáne jyldam júzege asyrý tájirıbesi bar. Biz qazirdiń ózinde jeke kompanııalardyń osy baǵytta jaqsy nátıjelerin kórip otyrmyz. Mundaı mysaldar ekonomıkanyń barlyq salasynda mindetti túrde keńinen taratylýy kerek. Qarjy ınstıtýttary, eń aldymen, tsıfrlandyrý jáne jasandy ıntellektini qoldaný deńgeıi joǵary jobalarǵa qoldaý kórsetkeni jón. Memleket basshysy jasandy ıntellektiniń pılottyq bastamalar deńgeıinde qalyp qoımaı, ony otandyq ekonomıkanyń naqty draıverine aınaldyrý úshin bizden júıeli sheshimder kútedi. Jasandy ıntellekt jobalarynyń biryńǵaı pýlyn qalyptastyrý qajet. Bul aldymyzdaǵy maqsat-mindetterdiń aýqymyn aıqyndap, sapaly úılestirýdi qamtamasyz etedi jáne jobalardyń qaıtalanýyn boldyrmaýǵa, resýrstardy tıimdi jumsaýǵa yqpal etedi, — dedi Premer-mınıstr.
Budan buryn habarlanǵandaı, Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev birqatar salaǵa jasandy ıntellekti qalaı engizilip jatqanyn túsindirdi.
