Jasandy ıntellekt jer qoınaýyn barlaýǵa qalaı kómektesip jatyr

ASTANA. KAZINFORM – Elimizde geologııa jáne jer qoınaýyn paıdalaný salasynda tsıfrlyq transformatsııa jalǵasyp jatyr. Tolyǵyraq Ónerkásip jáne qurylys vıtse-mınıstri Jánnat Dúbirova aıtyp berdi.

– Jyl sońyna deıin geologııalyq esepterdi óńdeý jáne geologııalyq zerdeleý bazasyn qalyptastyrý boıynsha jasandy ıntellekt kómegimen jobany iske asyrý josparda bar. Jasandy ıntellekt skanerlengen qujatty, esepti, keste men kartany tanıdy. Barlyq málimet bazaǵa júktelip, Big Data qalyptastyrady. Jobanyń alǵashqy kezeńi, júıe prototıpin jasaý jáne bastapqy Big Data bazasyn qalyptastyrý bolashaq damý úshin tabysty irgetas boldy. Big Data bolashaqta ken oryndaryn tabý yqtımaldyǵyn boljaý men baǵalaýǵa arnalǵan derekterdi óńdeýdi avtomattandyrady, – dedi Jánnat Dúbirova ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń aıtýynsha, biryńǵaı platformada memlekettik qyzmetten bólek, esepti onlaın tapsyrý fýnktsııasy da qoljetimdi. Búginde geologııa jáne jer qoınaýyn paıdalaný salasynda 22 memlekettik qyzmet tsıfrlandyrylǵan biryńǵaı jer qoınaýyn paıdalaný platformasy jumys istep tur.

– Bıyl jer qoınaýyn paıdalanýshylar alǵash tsıfrlyq formatta esep tapsyrdy. Sonymen qatar kelisimshart men lıtsenzııany da tsıfrlandyrý boıynsha jumys isteldi. Qazir 3449 kelisimshart pen lıtsenzııa tsıfrlandyryldy. Sondaı-aq ákimdiktermen birlesip 2024 kelisimshart pen lıtsenzııa tsıfrlandyryldy, – dep tolyqtyrdy mınıstrdiń orynbasary.

Buǵan deıin habarlaǵanymyzdaı, Qazaqstanda qurylys barysyn dron jáne jasandy ıntellektiniń kómegimen baqylaıdy.