Jasandy ıntellekt jappaı jumyssyzdyqqa alyp kelmeıdi – Tsıfrlyq mınıstrligi

ASTANA. KAZINFORM — Kún saıyn jasandy ıntellekt ómirimizge keńinen enip barady, qazir adam jasaı almaıtyn dúnıeni jasandy ıntellekt jasap jatyr. Osy oraıda eńbek naryǵyna keń tarap, arty jumyssyzdyqqa alyp kelmeı me?

Bul saýalǵa Tsıfrlyq damý, ınnovatsııalar jáne aeroǵarysh ónerkásibi mınıstrligi Jasandy ıntellekt jáne ınnovatsııalardy damytý komıtetiniń tóraǵasy Ǵızzat Baıtursynov jaýap berdi.

— Biz jasandy ıntellekt eńbek naryǵyn ózgertedi degenmen kelisemiz, biraq bul jappaı jumyssyzdyq bolady degendi bildirmeıdi. Bizdiń oıymyzsha, jumys oryndary joıylmaıdy, kerisinshe, mamandyqtar transformatsııalanady, — dedi Ǵızzat Baıtursynov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, kez kelgen jańa tehnologııa sııaqty, jasandy ıntellekti de jańa jumys oryndarynyń ashylýyna septigin tıgizedi.

— Bizdiń basty mindet — adamdardy jasandy ıntellektini paıdalaný daǵdylaryna qaıta oqytý. Dál osy maqsatta biz Astana Hub-pen birlesip bilim berý baǵdarlamalaryn iske qosyp jatyrmyz. Aldaǵy 5 jylda keminde 1 mıllıon adamdy oqytýdy kózdep otyrmyz, — deıdi mınıstrlik ókili.

Buǵan deıin elimizde oqýshydan memlekettik qyzmetshige deıin jasandy ıntellektini meńgeretinin jáne onyń mańyzy týraly jazǵan edik. 

Aıta keteıik, aldaǵy bes jylda 1 mln-ǵa jýyq qazaqstandyq jasandy ıntellektini meńgeredi. 

Sondaı-aq Qazaqstan Chat GPT sekildi óz jasandy ıntellektin jasap shyǵarmaq. Aqyldy júıe KazLLM dep atalady. 

Eske salsaq, Prezıdent janyndaǵy jasandy ıntellekt jóninde keńestiń quramynda kimder bolatynyn habarlaǵan bolatynbyz. 

Odan bólek, jasandy ıntellektiniń kómegimen qıyn jaǵdaıdaǵy otbasyn qoldaý tetigi engizilmek.