Jasandy ıntellekt jáne tsıfrlyq damý mınıstrligi quryldy

ASTANA. KAZINFORM — Prezıdent Qasym-Jomart Toqaev memlekettik basqarý júıesin odan ári jetildirý jónindegi sharalar týraly qujatqa qol qoıdy.

- Qazaqstan Respýblıkasynyń Konstıtýtsııasy 44-babynyń 3) tarmaqshasyna sáıkes memlekettik basqarý júıesiniń tıimdiligin arttyrý maqsatynda QAÝLY ETEMІN:

1. Innovatsııalyq qyzmet salasyndaǵy fýnktsııalar men ókilettikterdi Qazaqstan Respýblıkasynyń Ǵylym jáne joǵary bilim mınıstrligine bere otyryp, Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligi Qazaqstan Respýblıkasynyń Jasandy ıntellekt jáne tsıfrlyq damý mınıstrligi bolyp qaıta qurylý jolymen qaıta uıymdastyrylsyn.

2. Qazaqstan Respýblıkasynyń Jasandy ıntellekt jáne tsıfrlyq damý mınıstrligi men Qazaqstan Respýblıkasynyń Ǵylym jáne joǵary bilim mınıstrligi beriletin fýnktsııalar men ókilettikterge sáıkes Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrliginiń quqyqtary men mindetteriniń quqyqtyq mırasqory bolyp aıqyndalsyn.

3. Qazaqstan Respýblıkasynyń Úkimeti Qazaqstan Respýblıkasynyń zańnamasynda belgilengen tártippen:

1) Qazaqstan Respýblıkasy Prezıdentiniń Ákimshiligimen kelisý boıynsha memlekettik organdardyń jáne olarǵa vedomstvolyq baǵynysty uıymdardyń shtat sanyn qaıta bólýdi;

2) osy Jarlyqty iske asyrý boıynsha ózge de sharalar qabyldaýdy qamtamasyz etsin.

4. «Qazaqstan Respýblıkasy Úkimetiniń qurylymy týraly» Qazaqstan Respýblıkasy Prezıdentiniń 1999 jylǵy 22 qańtardaǵy № 6 Jarlyǵyna mynadaı ózgeris engizilsin:

1-tarmaqtaǵy «Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligi» degen jol mynadaı redaktsııada jazylsyn: «Qazaqstan Respýblıkasynyń Jasandy ıntellekt jáne tsıfrlyq damý mınıstrligi».

5. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

6. Osy Jarlyq qol qoıylǵan kúninen bastap qoldanysqa engiziledi, - delingen qujatta.

Aıta keteıik, Prezıdent fýtbol klýbtaryn jekeshelendirýdi jedeldetý qajettigin aıtty.