Jasandy ıntellekt jáne feık kontent: BAQ aldynda qandaı jańa syn-qaterler bar
ASTANA. KAZINFORM — Astanada buqaralyq aqparat quraldarynyń ókilderi bas qosyp, búgingi kúnniń asa ózekti taqyryby – jalǵan aqparat dáýirindegi mass-medıa róli týraly pikir almasty. Túrkııanyń Qazaqstandaǵy Elshiliginiń qoldaýymen ıÝnýs Emre atyndaǵy túrik mádenı ortalyǵy uıymdastyrǵan sharaǵa qalalyq, respýblıkalyq jáne halyqaralyq BAQ ókilderi qatysty.
Túrkııa Respýblıkasynyń Qazaqstan Respýblıkasyndaǵy Elshisiniń Baılanys jónindegi keńesshisi Hasan Kýchýkkandemırdiń aıtýynsha, dezınformatsııamen kúres — qazirgi kezeńdegi mańyzdy basymdyqtardyń biri. Keńesshi Túrkııada bul baǵytta arnaıy qurylymdar jumys isteıtinin jáne halyqaralyq deńgeıde tájirıbe almasýǵa daıyn ekenin jetkizdi.
Jýrnalıst, «Aman bala» áleýmettik jobasynyń avtory Gúlmıra Alıakparova atap ótkendeı, búgingi tańda jalǵan aqparat — tek aqparattyq másele ǵana emes, ol qoǵamdyq turaqtylyqqa, ulttyq qaýipsizdikke, tipti jeke adamdardyń taǵdyryna yqpal etetin kúshke aınaldy.
— Al jasandy ıntellektiniń kómegimen jasalǵan foto, vıdeo materıaldar balalardyń psıhologııalyq turaqtylyǵyna, emotsııalyq damýyna keri áserin tıgizip otyrǵany asa alańdatady, — dedi ol.
Aıta keteıik, Qazaqstan Prezıdenti Qasym-Jomart Toqaev tsıfrlyq tehnologııalardy damytý barysynda ulttyq qaýipsizdik, aqparattyq gıgıena jáne qoǵamnyń, ásirese jas urpaqtyń múddesin qorǵaý máseleleri qatar júrýi tıis ekenin aıtqan edi. Memleket basshysy jasandy ıntellektimen jumys isteý daǵdysyn qalyptastyrýdy mektep qabyrǵasynan qolǵa alýdy tapsyrǵan bolatyn.
«Jasandy ıntellektiniń qarqyndy damýy qazirdiń ózinde halyqtyń, ásirese, jastardyń minez-qulqy men bolmys-bitimine áser etip jatyr… Biz buǵan daıyn bolyp, batyl áreket etýimiz kerek. Áıtpese artta qalýdyń saldary óte aýyr bolady», — dedi Prezıdent Qazaqstan halqyna Joldaýynda.
Basqosýda TRT Kazakstan telearnasynyń basshysy Mehmed Chalyshkan arna Túrki memleketterimen birlesip, tsıfrlyq qaýipterge qarsy ortaq aqparattyq keńistik qalyptastyrýǵa kúsh salyp jatqanyn jetkizdi.
Bul baǵytta Túrki elderiniń basshylary qolǵa alǵan birlesken is-qımyly týraly aıtar bolsaq, 2025 jyldyń qazan aıynda Ázerbaıjanda ótken Túrki memleketteri uıymynyń resmı sammıtinde Memleket basshysy Q. Toqaev Astanadaǵy Alem.AI jasandy ıntellekt ortalyǵynda Túrki memleketteri uıymynyń Tsıfrlyq ınnovatsııalar ortalyǵyn qurýdy, ortalyqta birlesken startap jobalardy damytýdy, solaısha, tsıfrlandyrý jáne jasandy ıntellektiniń áleýetin halyqtarymyzdyń ıgiligi úshin utymdy paıdalanýdy usynǵan edi. Bıylǵy sáýirde Alem.AI jasandy ıntellekt ortalyǵynyń alǵashqy nátıjelerimen Qazaqstanǵa resmı saparmen kelgen Túrkııa vıtse-prezıdenti Djevdet Iylmaz tanysyp qaıtqan bolatyn.
Al 2026 jylǵy 15 mamyrda Túrkistan qalasynda ótetin Túrki memleketteri uıymy basshylarynyń beıresmı sammıtinde dál osy «Jasandy ıntellekt jáne tsıfrlyq damý» taqyryby talqylanady dep josparlanyp otyr.
