Jasandy ıntellekt – jahandyq ekonomıkanyń basty qozǵaýshy kúshi – Memleket basshysy
ASTANA.KAZINFORM – Jasandy ıntellekt jahandyq damýdyń qozǵaýshy kúshine aınalady. Bul týraly Memleket basshysy Qasym-Jomart Toqaev Sheteldik ınvestorlar keńesiniń 38-shi plenarlyq otyrysynda aıtty.
– Memlekettiń ınvestıtsııalyq saıasatynda jasandy ıntellekt tehnologııalaryna mán berý – asa mańyzdy basymdyq. Bul qaıtalanbaly úderisterden arylyp, «aqyldy súzgi» qalyptastyrýǵa múmkindik beredi. Sol arqyly ınvestorlarǵa jedel, naqty ári tıimdi qyzmet kórsetiledi. ıÝNKTAD boljamy boıynsha, 2033 jylǵa qaraı álemdik jasandy ıntellekt ekonomıkasynyń kólemi 5 trıllıon dollarǵa jýyqtaıdy. Atalǵan kórsetkishtiń ondaǵan jyl ishinde shamamen 25 ese ulǵaıýy jahandyq ekonomıkadaǵy jasandy ıntellektiniń róli artyp kele jatqanyn baıqatady. Elimiz osy baǵytty belsendi qolǵa alýǵa nıetti. Byltyr halyqqa arnaǵan Joldaýymda Qazaqstandy tolyq tsıfrlyq memleketke aınaldyrý boıynsha naqty mindet júktedim. Jumysty júıeli júrgizý úshin 2026 jyl – Jasandy ıntellekt jáne tsıfrlyq damý jyly bolyp jarııalandy. Bolashaqtyń baǵdaryn aıqyndaı otyryp, biz azamattardyń tsıfrlyq qaýipsizdigine den qoıamyz. Qazaqstan Konstıtýtsııasynyń jańa redaktsııasy ár adamnyń derbes derekterin qorǵaýǵa kepildik beredi. Instıtýtsıonaldyq negizdi nyǵaıtý úshin Jasandy ıntellekt jáne tsıfrlyq damý mınıstrligi quryldy. Sonymen qatar Jasandy ıntellektini damytý jónindegi keńes óz jumysyn bastady, – dedi Prezıdent.
Qasym-Jomart Toqaev Keńes múshelerine zamanaýı tsıfrlyq ınfraqurylym qalyptastyrý boıynsha qarqyndy jumys júrgizilip jatqanyn málimdedi. Atap aıtqanda, Qazaqstan Ortalyq Azııa elderi arasynda alǵash ret ozyq tehnologııalar negizinde eki sýperkompıýterdi sátimen iske qosty.
– Investıtsııalarǵa tsıfrlyq dáýir talaptaryna saı keletin zamanaýı normatıvtik-quqyqtyq baza kepil bolady. Jaqynda Parlamentte qabyldanǵan Tsıfrlyq kodeks, «Jasandy ıntellekt týraly» zań jáne Digital Qazaqstan strategııasy el damýynyń aıqyn tehnologııalyq jol kartasyn túzedi. Bul qujattar ınnovatsııaǵa, ınvestıtsııa tartýǵa jáne halyqaralyq yntymaqtastyqty keńeıtýge de laıyqty jaǵdaı jasaıdy. Budan bólek, Qazaqstannyń tsıfrlyq ekonomıkasynyń negizgi elementteriniń biri sanalatyn Derekterdi óńdeý ortalyqtarynyń alqabyn qurýǵa nıettimiz. Biregeı joba jahandyq kapıtal men álemniń jetekshi tehnologııalyq kompanııalarynyń basyn qosatyn qýatty ortalyqqa aınalmaq. Amazon, G42 jáne basqa da salalyq kóshbasshylar osy ekojúıege qatysý múmkindigin qarastyra bastady, – dedi Memleket basshysy.
Aıta keteıik Qazaqstannyń tsıfrlyq transformatsııasy ınvestıtsııalyq tartymdylyqty arttyrýǵa yqpal etip otyrǵanyn jazǵanbyz.
