Jasandy ıntellekt tujyrymdamasynyń jobasy jarııalandy
ASTANA. KAZINFORM – «Ashyq NQA» portalynda elimizde jasandy ıntellektini damytýdyń 2024-2029 jyldarǵa arnalǵan tujyrymdamasynyń jobasy jarııalandy. Qujatty ázirleýshi QR tsıfrlyq damý, ınnovatsııalar jáne aeroǵarysh ónerkásibi mınıstrligi.
Tujyrymdama jobasyna sáıkes, Qazaqstanda sýperkompıýterler 2025 jylǵa qaraı iske qosylady dep kútilýde.
Sondaı-aq, ulttyq jasandy ıntellekt platformasyn qurý usynylady. Ol 90-nan astam memlekettik organnyń aqparattyq júıelerinen derekter jınalǵan Smart Data Ukimet bazasynda qurylady. Nátıjesinde jasandy ıntellekt tehnologııalaryn paıdalana otyryp usynylatyn memlekettik qyzmetter úlesiniń 2029 jylǵa qaraı 20%-ǵa ósýi boljanady. 2029 jylǵa qaraı jasandy ıntellekt platformasynda jasalǵan kem degende 25 jasandy ıntellekt sheshimi bolýy kerek.
Sonymen qatar, jasandy ıntellekt boıynsha sertıfıkat beretin oqytý kýrsyn ázirleý jáne ol ashyq ári qoljetimdi bolmaq. 2029 jylǵa qaraı keminde 80 myń adam jasandy ıntellekt boıynsha bilim alýy kerek.
Tujyrymdamadaǵy mańyzdy baǵyttardyń biri - neırondyq jelilerge negizdelgen ulttyq til modelin ázirlep, engizý.
«Ulttyq til modelin iske asyrý jasandy ıntellekt boıynsha túrli jobalarda qazaq tilin qoldanýǵa múmkindik beredi, osylaısha sheteldik servısterge táýeldilikti azaıtady. Sonymen qosa, atalǵan baǵyt boıynsha otandyq saraptama jasaýǵa múmkindik beredi, tsıfrlyq ortada óz mádenıeti men qundylyqtaryn saqtaýǵa yqpal etip, bir tildik topqa kiretin tildik modeldi damytýǵa serpin beredi», - delingen jarııalanǵan qujat jobasynda.
Mınıstrlikte jasandy ıntellekt salasynda adam quqyqtary men bostandyqtaryn saqtaýdy, jasandy ıntellektke qatysty sapasyz sheshimderdiń saldarynan kemsitýshiliktiń barlyq túrine jol bermeýdi, Qazaqstannyń adamgershilik, rýhanı jáne mádenı qundylyqtaryna sáıkestikti qamtamasyz etýdi kózdeıtin ádep erejeleri qabyldanýy tıis dep sanaıdy.
Qazir jasandy ıntellekt júıelerine nemese robottarǵa salyq salýdyń qajeti joq. Bul áreketti júzege asyrý kompanııalardyń jasandy ıntellektti ázirleý jáne engizý úshin neǵurlym qolaıly jaǵdaılar jasalǵan basqa elderdiń ıýrısdıktsııalaryna kóshýine ákelýi múmkin.
«Jasandy ıntellekt ónimderin paıdalaný kezinde týyndaýy múmkin adam qaýipsizdigin qozǵaıtyn táýekelderdiń baqylaýynda bolýyn qamtamasyz etý úshin elimizde jasandy ıntellektti retteý jónindegi komıssııa qurylatyn bolady. Onyń fýnktsııasyna jasandy ıntellekt qaýipsizdigi, etıkalyq normalardy saqtaý, normatıvtik-tehnıkalyq jáne normatıvtik-quqyqtyq qujattarǵa sáıkestik, jasandy ıntellekt ónimin baǵalaý jáne ony qamtamasyz etý kiredi. Komıssııa quramyna tıisti salalar boıynsha sarapshylar tartylady. Sondaı-aq komıssııa turaqty negizde jasandy ıntellekt tehnologııalary ákeletin táýekelderdi anyqtaý boıynsha jumys júrgizetin bolady», - delingen tujyrymdama jobasynda.
