Jasandy ıntellekt týraly zań kúshine endi
ASTANA. KAZINFORM — Qazaqstanda «Jasandy ıntellekt týraly» jańa zań kúshine endi. Zańǵa qol qoıylǵan sátten bastap 60 kún ótti jáne belgilengen rásimderge sáıkes, búginnen bastap qujat tolyq kólemde qoldanysqa engizildi. Bul týraly Jasandy ıntellekt jáne tsıfrlyq damý mınıstrligi málim etti.
Qabyldanǵan zań elde jasandy ıntellektini qoldanýdyń quqyqtyq negizin qalyptastyryp, saladaǵy memlekettik saıasattyń basty qaǵıdaty — adam, onyń quqyqtary, bostandyqtary men ál-aýqatynyń basymdyǵy týraly erejelerdi bekitedi. Adam, onyń ómiri men erik-jigeri jasandy ıntellekt júıelerin qurý jáne paıdalanýda eń joǵarǵy qundylyq retinde qarastyrylady. JI-di qoldaný adamnyń sanaly túrde sheshim qabyldaý qabiletin shektemeýi tıis, al azamattardyń erkindigi tehnologııalardy qoldanýdyń barlyq kezeńinde saqtalýy qajet.
— Zań jasandy ıntellektini paıdalanýdy, atap aıtsaq ádildik pen teńdik, algorıtm ashyqtyǵy men túsiniktiligi, jaýapkershilik pen baqylaýda bolýy, derekter men qupııalyqty qorǵaý, sondaı-aq JI júıeleriniń qaýipsizdigi men senimdiligi týraly erejelerdi aıqyndaıdy. Paıdalanýshylarǵa jasandy ıntellekt júıeleriniń múmkindikteri, sıpattamalary men shekteýleri týraly tolyq aqparat usynylýy shart, — delingen habarlamada.
Azamattar avtomattandyrylǵan derekterdi óńdeýdiń qoldanylýy, onyń saldary, mundaı óńdeýge qarsylyq bildirý múmkindigi, sondaı-aq óz quqyqtary men zańdy múddelerin qorǵaý tetikteri týraly habardar bolýǵa quqyly.
Qujat jasandy ıntellekt júıeleriniń ıeleri men paıdalanýshylary arasyndaǵy jaýapkershilikti naqtylaıdy. JI júıeleriniń ómirlik tsıkliniń barlyq qatysýshylary olardyń jumysyn baqylaýdy qamtamasyz etýge, táýekelderdi basqarýǵa jáne júıeler jumysynyń nátıjeleri úshin Qazaqstan Respýblıkasynyń zańnamasyna sáıkes jaýapkershilik alýǵa mindetti.
Jasandy ıntellekt júıelerin qurý jáne paıdalaný qorshaǵan ortaǵa teris áser etpeýi, sondaı-aq energııa tıimdiligi talaptaryn saqtaı otyryp júzege asyrylýy tıis.
— JI júıelerin paıdalaný jeke derekter men qupııa aqparatty qorǵaý talaptary saqtalǵan jaǵdaıda ǵana ruqsat etiledi. Zań derekterge ruqsatsyz qol jetkizýdiń aldyn alý sharalaryn, sapaly derekterdi paıdalanýdy, JI júıeleriniń qaýipsizdigi men senimdiligin qamtamasyz etýdi kózdeıdi, — habarlady vedomstvodan.
Qujatqa sáıkes, jasandy ıntellekt júıeleri táýekel deńgeıi boıynsha — tómen, orta jáne joǵary táýekeldi júıelerge jikteledi. Mańyzdy salalarda nemese memlekettik aqparattyq resýrstardy qalyptastyrý kezinde qoldanylatyn joǵary táýekeldi júıeler aqparattyq qaýipsizdik talaptary boıynsha memlekettik júıelerge teńestiriledi.
Endi Qazaqstan aýmaǵynda: manıpýlıatıvti ádisterdi qoldanatyn; adamnyń jasyna, densaýlyq jaǵdaıyna nemese áleýmettik mártebesine baılanysty osal tustaryn paıdalanatyn; áleýmettik nemese bıometrııalyq kemsitýshilikke jol beretin; adamnyń emotsııasyn onyń kelisiminsiz anyqtaıtyn; jeke derekter týraly zańnamany buzatyn; tyıym salynǵan kontent jasaıtyn nemese taratatyn jasandy ıntellekt júıelerin qurýǵa jáne paıdalanýǵa tyıym salynady.
Zań jasandy ıntellektini paıdalanýdyń ashyqtyǵyna qoıylatyn talaptardy belgileıdi. Paıdalanýshylar taýarlar, jumystar nemese qyzmetter JI-di qoldaný arqyly jasalǵanyn bilýi shart. Sıntetıkalyq kontent mindetti túrde tańbalanýǵa jáne paıdalanýshylar úshin túsinikti eskertýmen belgilenýi tıis.
Jasandy ıntellektini paıdalaný arqyly jasalǵan týyndylar adamnyń shyǵarmashylyq úlesi bolǵan jaǵdaıda ǵana «avtorlyq quqyq obektisi» dep tanylady. Adamnyń zııatkerlik qyzmetiniń nátıjesi arqyly alynǵan mátindik suraýlar (prompttar) da avtorlyq quqyqpen qorǵalady. Avtor nemese quqyq ıesi tyıym salmaǵan jaǵdaıda ǵana JI modelderin oqytý úshin týyndylardy paıdalanýǵa ruqsat etiledi.
«Jasandy ıntellekt týraly» zańnyń kúshine enýi Qazaqstanda jaýapty, qaýipsiz jáne adamǵa baǵdarlanǵan jasandy ıntellektini damytýdaǵy mańyzdy kezeń. Bul model ınnovatsııalar, azamattardyń quqyqtaryn qorǵaý jáne tsıfrlyq ekonomıkanyń ornyqty damýy arasyndaǵy tepe-teńdikti qamtamasyz etýge baǵyttalǵan.
Aıta keteıik, memlekettik qyzmetshiler JI-di kúndelikti jumysyna engizip jatyr.