Jasandy ıntellekt tergeýshilerge kómektesedi: ІІM pılottyq jobany iske qosty
ASTANA. KAZINFORM — Jasandy ıntellekt "Sotqa deıingi tergep-tekserý biryńǵaı tizilimi" aqparattyq júıesine biriktirilgen jáne tergeýshiniń kúndelikti jumysyn avtomattandyrýǵa kómektesedi.
Memleket basshysynyń jasandy ıntellektini jedel damytý jónindegi tapsyrmasyn oryndaý aıasynda Іshki ister mınıstrligi tergeýshiniń ınteraktıvti kómekshisi jobasyn iske qosty. Jobanyń basty maqsaty — qylmystyq isterdi tergeý sapasy men jedeldigin arttyrý.
Júıeniń múmkindikteri: daýysty mátinge aınaldyrý; túrli adamdardyń jaýaptaryn salystyryp, qarama-qaıshylyqtardy anyqtaý; jaýap alý úshin naqtylaıtyn suraqtar usyný; protsessýaldyq qujattardy avtomatty túrde qalyptastyrý.
Ol tórt negizgi modýlden turady: tergeýdi josparlaý; jaýaptardy óńdeý; qujattardy daıyndaý; taldaý jáne boljam jasaý. Bul joba tergeý ýaqytyn qysqartyp, tergeýshilerdi tehnıkalyq júktemeden bosatýǵa múmkindik beredi.
19 maýsymnan bastap júıe pılottyq rejımde Astana qalasy Esil aýdanynyń polıtsııa basqarmasy bazasynda iske qosyldy. Kelesi aptada Aqmola oblysy Qosshy qalalyq polıtsııa bóliminde iske qosý josparlanyp otyr.
Aıta ketelik «Qazaqtelekom» AQ basqarma tóraǵasy Baǵdat Mýsın áleýmettik jelide Almatyda sýperkompıýter ornatýdyń jaqyn arada bastalatynyn aıtqan edi.