Jasandy ıntellekt tehnologııalary mektepterdi basqarý tásilderin ózgertedi
ASTANA. KAZINFORM — Astanada «Keleshek mektepteriniń tujyrymdamasy: ortaq maqsat, ujymdyq damý» taqyrybynda ótken strategııalyq konferentsııa aıasynda mektep dırektorlary bilim berý protsesinde jasandy ıntellekt tehnologııalaryn qoldaný múmkindikterimen tanysty.
Semınar barysynda Bıbars Seıtnııazov bilim berý protsesine jasandy ıntellektti engizýdiń negizgi baǵyttaryn tanystyrdy. Sala mamandarynyń pikirinshe AI platformalar muǵalimderdiń kúndelikti jumysyn avtomattandyryp, oqý protsesin derbestendirýge múmkindik beredi. Atap aıtqanda, jasandy ıntellektige negizdelgen jańa platformalar sabaq josparlaryn qurastyryp, baǵalaý tapsyrmalaryn ázirleýge jáne oqýshylardyń úlgerimin taldaýǵa kómektesedi.
Jasandy ıntellekt tehnologııalaryn engizý mektepti basqarý tásilderin de ózgertedi. Dırektorlar oqý protsesin naqty derekter negizinde taldap, basqarýshylyq sheshimderdi tıimdi qabyldaı alady. Sonymen qatar ár oqýshynyń bilim alý traektorııasyn jeke baqylaý múmkindigi keńeıedi.
Semınarda pedagogtiń róliniń ózgerýi de nazardan tys qalǵan joq. Jańa jaǵdaıda muǵalim tek bilim berýshi emes, oqýshynyń jeke damýyn baǵyttaıtyn jáne tsıfrlyq ortada jumys isteıtin maman retinde qarastyrylady.
Praktıkalyq bólimde mektep basshylary jasandy ıntellektke negizdelgen platformalardy óz bilim berý uıymdaryna engizý joldaryn talqylap, naqty qadamdardy aıqyndady. Nátıjesinde qatysýshylar oqý protsesin tıimdi uıymdastyrýǵa jáne basqarý sapasyn arttyrýǵa baǵyttalǵan zamanaýı quraldardy meńgerdi.
Aıta ketelik muǵalimderdiń pándik bilimin baǵalaý testi toqtatylǵan edi.
