Jasandy ıntellekt sýdıalardy almastyra almaıdy — EAEO Sotynyń sýdıasy
ASTANA. KAZINFORM — Jasandy ıntellekt sot júıesiniń jumysyn jedeldetkenimen, ol sýdıany almastyra almaıdy. Bul týraly Jibek Joly telearnasyna bergen suhbatynda Eýrazııalyq ekonomıkalyq odaq Sotynyń sýdıasy Natalıa Pavlova aıtty.
Natalıa Pavlovanyń aıtýynsha, jasandy ıntellekt máselesi búginde ulttyq sottar úshin de, halyqaralyq sottar úshin de ózekti. Óıtkeni ádil sot júıesi qazirgi zamanǵy áleýmettik shyndyqtan tys qala almaıdy.
— Qazir jasandy ıntellekt qoǵamdaǵy barlyq derlik salalarǵa áser etip keledi. Al sottyń negizgi mindeti — azamattardyń, kásiptiń jáne ózge de sharýashylyq sýbektileriniń quqyqtaryn tsıfrlyq dáýir jaǵdaıynda qorǵaý, — dedi ol.
Sýdıa jańa tehnologııalardan týyndaıtyn quqyqtyq máseleler sot tájirıbesinde alǵashqylardyń biri bolyp qaralatynyn aıtty. Mysal retinde ol EAEO aıasynda talqylanǵan «aqyldy saǵattardy» kedendik jikteý isin keltirdi.
— Qazirgi aqyldy saǵattar 90-jyldardaǵy qarapaıym elektrondy saǵattar emes. Olar — aqparat alýǵa, tsıfrlyq ortamen ózara árekettesýge múmkindik beretin tolyqqandy kommýnıkatsııalyq qurylǵy. Sot bul jaǵdaıda onyń jańa tehnologııalyq qurylǵy ekenin tanyp, kedendik baj mólsherin aıqyndaýǵa áser etken sheshim qabyldady, — dedi Natalıa Pavlova.
Sondaı-aq ol COVID-19 pandemııasy sot júıesin tsıfrlandyrýǵa úlken serpin bergenin aıtty. Búginde azamattar men kásipkerler sotqa qujattardy elektrondy túrde tapsyrady, sot otyrystaryna qashyqtan qatysady. Osylaısha sot sheshimderin jedel ala alady.
— Halyqaralyq sot tóreligi de ulttyq júıelerden qalys qalmaýy tıis. Eýrazııalyq ekonomıkalyq odaq elderiniń azamattary Ystyqkólden Kalınıngrad pen Sahalınge deıin sot organdarymen elektrondy formatta erkin baılanys ornatýy tıis, — dedi sýdıa.
Onyń aıtýynsha, jasandy ıntellekt sýdıany almastyrý úshin emes, kerisinshe, sot jumysyn jeńildetý úshin qajet. JI úlken kólemdegi quqyqtyq aqparatty taldaýǵa jáne biryńǵaı quqyq qoldaný tájirıbesin qalyptastyrýǵa yqpal etedi.
— Kez kelgen sanaly adam túsinedi: robottar sýdıany almastyra almaıdy. Óıtkeni sot tóreliginiń negizi — adamǵa tán aqyl men túısik. Al jasandy ıntellektte ondaı qasıet joq, — dep atap ótti Natalıa Pavlova.
Alaıda ol shaǵyn aıyppuldar men dálelderi anyq isterde tehnologııalardy qoldanýǵa bolady dep esepteıdi. Biraq kez kelgen jaǵdaıda azamattyń isti sýdıaǵa qaıta qaratý quqyǵy saqtalýy tıis.
Sondaı-aq Natalıa Pavlova tsıfrlyq ıýrısdıktsııa men halyqaralyq ınternet-platformalar arqyly tutynýshylar quqyǵyn qorǵaý máselesine de toqtaldy. Onyń aıtýynsha, sot tájirıbesi azamattyń óz quqyǵyn óz elinde qorǵaý múmkindigi bolýy tıis degen qaǵıdatqa negizdeledi.
— Tutynýshy óz quqyqtaryn ózi turatyn ıýrısdıktsııada qorǵaýǵa tıis. Sebebi platforma dál sol naryqqa baǵyttalǵan qyzmet kórsetedi, — dedi ol.
Sóz sońynda Natalıa Pavlova sýdıalardyń qoǵamnan oqshaýlanbaýy kerektigin atap ótti.
— Sýdıalar vakýýmde ómir súre almaıdy. Olar qoǵamdaǵy úderisterdi, sonyń ishinde tsıfrlyq tehnologııalardyń damýyn tereń túsinýi tıis, — dep túıindedi ol.
Aıta keteıik, buǵan deıin Qytaı soty qyzmetkerdi JI-men almastyrý — jumystan shyǵarýǵa zańdy negiz emes ekenin aıtqan bolatyn.
