Jasandy ıntellekt, Smart City jobasy: Oljas Bektenov Tomas Pramotedhammen birqatar máseleni talqylady
ASTANA. KAZINFORM – Premer-mınıstr Oljas Bektenov Presight AI halyqaralyq kompanııasynyń bas dırektory Tomas Pramotedhammen kezdesý ótkizdi. Bul týraly Úkimettiń baspasóz qyzmeti habarlady.
Onda jasandy ıntellekt jáne tsıfrlyq ınfraqurylym salasyndaǵy yntymaqtastyq, Smart City jobalaryn júzege asyrý, kóliktik tsıfrlyq júıeler men derekterdi saqtaý jáne óńdeý ınfraqurylymyn damytý máseleleri talqylandy.
Presight AI kompanııasy halyqaralyq G42 tobyna kiredi jáne jasandy ıntellekt pen úlken derekterdi taldaý salasynda qoldanbaly sheshimder ázirleýge mamandanǵan. Kompanııanyń qatysýymen Astanada Smart City jobasy júzege asyryldy, Alem.Cloud ulttyq sýperkompıýterlik ınfraqurylymy quryldy.
Kezdesý barysynda kólik salasyna tsıfrlyq sheshimderdi odan ári engizý, Astana halyqaralyq áýejaıynyń ıntellektýaldyq ınfraqurylymyn damytý boıynsha ózara is-qımyl perspektıvalary aıqyndaldy. Qalalyq basqarýdyń tıimdiligin, servısterdiń qaýipsizdigi men sapasyn arttyrý, sondaı-aq otandyq tehnologııalyq saraptama men kadrlyq áleýetti damytý úshin jasandy ıntellekt tehnologııalaryn qoldaný múmkindikterine nazar aýdaryldy.
Oljas Bektenov Qazaqstan tsıfrlyq transformatsııanyń jańa kezeńine ótip jatqanyn atap ótti.
Memleket basshysy Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalady. Elimizde uzaqmerzimdi jáne tehnologııalyq ınvestıtsııalar tartý úshin qolaıly jaǵdaılar jasalǵan. Investorlarǵa memlekettik qoldaý sharalary, salyqtyq jáne kedendik preferentsııalar qoljetimdi, Altyn Visa arnaıy vızalyq rejımi engizilýde, jobalardy súıemeldeý «bir tereze» qaǵıdaty boıynsha júzege asyrylady.
Tomas Pramotedham Presight AI kompanııasy Qazaqstandaǵy qyzmetin keńeıte túsýge, jańa birlesken jobalardy júzege asyrýǵa daıyn ekenin atap ótti. Kompanııa qoldanbaly jasandy ıntellekt, tsıfrlyq ınfraqurylym jáne ekonomıkanyń negizgi salalaryna tehnologııalyq sheshimderdi engizý salalarynda yntymaqtastyqty odan ary damyta bermek.
Kezdesý qorytyndysy boıynsha bolashaqtaǵy yntymaqtastyqtyń basym baǵyttary aıqyndaldy.
Oljas Bektenov kólik salasynyń transformatsııasyn teksergenin jazǵan edik.
