Jasandy ıntellekt salasynda 25 bilim berý baǵdarlamasy ázirlendi
ASTANA. KAZINFORM – Ǵylym jáne joǵary bilim mınıstrligi elimizdegi joǵary oqý oryndarynda jasandy ıntellekt salasyna kadr daıarlaýǵa qatysty túsinik berdi.
- Qazirgi kezde 20 joǵary oqý orny jasandy ıntellekt salasynda 25 jańa bilim berý baǵdarlamasy ázirlendi. Olardyń arasynda: «Qoldanbaly jasandy ıntellekt», «Jasandy ıntellekt jáne blokcheın ınjenerııasy», «Kıbernetıka jáne jasandy ıntellekt», «Medıtsınadaǵy jasandy ıntellekt», «Jasandy ıntellekt jáne derekterdi taldaý», «Smart tehnologııalar jáne kólik mashına jasaýdaǵy jasandy ıntellekt», «Kompıýterlik ǵylym jáne jasandy ıntellekt» jáne basqa da baǵyttar qamtylǵan. Jańa bilim berý baǵdarlamalary arqyly túlekter Python baǵdarlamalaý, kitaphanalarmen jáne freımvorktarmen jumys (TensorFlow, Keras, PyTorch), derekterdi taldaý jáne vızýalızatsııa (Pandas, NumPy, Matplotlib, Seaborn), derekqorlarmen jumys (SQL, NoSQL), JI sheshimderin bıznes-protsesterge ıntegratsııalaý, neırondyq jelilerdi ázirleý jáne engizý, JI kómegimen protsesterdi avtomattandyrý jáne basqa da baǵyttardy meńgeredi, - delingen mınıstrliktiń Kazinform agenttigine bergen jaýabynda.
Sonymen qatar, qazir jetekshi sheteldik ýnıversıtettermen birlesip jasandy ıntellekt salasynda kadrlardy daıarlaý júrgizilip jatyr. Qorqyt Ata atyndaǵy Qyzylorda ýnıversıteti jáne Seýl ulttyq ǵylym jáne tehnologııalar ýnıversıtetimen birlesip, «AI Architect» (JI sáýletshisi) jáne «Data Management» (Derekterdi basqarý) baǵyttary boıynsha qos dıplom baǵdarlamasyn iske qosý josparlanǵan. Sátbaev atyndaǵy Qazaq ulttyq tehnıkalyq zertteý ýnıversıteti jáne CityU arasynda yntymaqtastyq týraly memorandým aıasynda JI salasyndaǵy kompıýterlik ǵylymdar boıynsha bakalavrıattyń qos dıplomdy baǵdarlamasyn jáne «Machine Learning & Data Science» magıstratýra boıynsha mamandar daıarlaý iske asyrylyp jatyr.
- Sátbaev atyndaǵy QazUTZÝ salalardy turaqty damytý úshin derekterdi zııatkerlik taldaýmen baılanysty jobalardy iske asyrady. Agrotehnologııalarda, ekologııalyq monıtorıngte, fınteh-sheshimderde mashınalyq oqytýdy qoldaný, JI-júıelerin ázirleý boıynsha zertteýler júrgizilip jatyr. Osy jyly ýnıversıtettiń JI boıynsha ulttyq bastamashyl jobalarǵa qatysýynda mańyzdy kezeń boldy, - dep atalyp ótken Ǵylym mınıstrligi aqparatynda.
2024-2025 oqý jylynan bastap «Mashına jasaýdaǵy smart-tehnologııalar jáne jasandy ıntellekti» ınnovatsııalyq bilim berý baǵdarlamasy iske asyrylyp keledi. 2025-2026 oqý jylynda University Alliance of Science and Technology kompanııasymen birlesip ázirlengen «Jasandy ıntellekti» jańa bilim berý baǵdarlamasy boıynsha qabyldaý bastalady. Ol qyzmettiń ártúrli salalarynda kúrdeli mindetterdi sheshýge qabiletti jasandy ıntellekti salasynda tereń bilimi men quzyreti bar joǵary bilikti mamandardy daıarlaýǵa baǵyttalǵan.
Buǵan deıin qurylys barysyn baqylaýdy dron jáne jasandy ıntellektiniń kómegimen júzege asyrý eskerilgenin jazǵan edik.