Jasandy ıntellekt pen tsıfrlandyrý máseleleri talqylanǵan pikirsaıys básekesi ótti
ASTANA. KAZINFORM – Elimizde aýqymdy pikirsaıys týrnıri ótti. Joba aıasynda qatysýshylar jasandy ıntellekt, tsıfrlandyrý jáne áleýmettik máseleler boıynsha pikir talastyrdy. Osylaısha olar synı oılaý men dáleldi dıskýrs mádenıetiniń joǵary deńgeıin kórsetti.
Almatyda Narxoz University uıymdastyrýymen «TEO CUP XV» respýblıkalyq pikirsaıys básekesi ótti. 11–12 sáýir kúnderi bolǵan dodaǵa elimizdiń ár óńirinen 136 fraktsııa, ıaǵnı 272 spıker qatysty. Jalpy 700-ge jýyq adam jınaldy.
Jobanyń maqsaty – jas býynnyń synı oılaý qabiletin damytý. Intellektýaldyq jarys mazmuny men uıymdastyrylý deńgeıi boıynsha elimizdegi eń iri stýdenttik jáne mekteparalyq jobalardyń biri boldy.
Báseke birneshe formatta uıymdastyryldy. Alǵashqy ıntellektýaldyq kezeńde – BPF formatyndaǵy tórt irikteý raýndy ótkizildi. Ár raýndta stýdentter usynǵan argýmentter derekterge negizdelip, analıtıkalyq qurylym arqyly jetkizildi.
Odan keıin jarys irikteý kezeńderi, pleı-off jáne fınaldyq raýndtarmen jalǵasty. Sondaı-aq qatysýshylar úshin zııatkerlik oıyndar men qosymsha is-sharalar uıymdastyryldy.
Uıymdastyrýshylardyń aıtýynsha, «TEO CUP XV» pikirsaıys alańynyń taqyryptary kezdeısoq tańdalǵan joq. Básekeniń mazmuny Memleket basshysy usynǵan «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Joldaýdaǵy strategııalyq baǵyttarǵa negizdelgen.
Jarys barysynda qatysýshylar tek teorııalyq pikir almasýmen shektelmedi. Olar naqty keısterge súıene otyryp, jasandy ıntellekttiń ekonomıkaǵa, eńbek naryǵyna, bilim berý júıesine jáne memlekettik basqarýǵa yqpalyn tereń taldady. Osylaısha pikirsaıystyń klassıkalyq formaty zamanaýı policy discussion deńgeıine kóterildi.
Pikirtalas barysynda el bolashaǵyna qatysty mańyzdy usynystar da aıtyldy. Atap aıtqanda, tsıfrlyq teńsizdikti azaıtý, jasandy ıntellektini bilim berý júıesine engizý, memlekettik qyzmetterdi avtomattandyrý jáne ulttyq derekter ınfraqurylymyn damytý boıynsha birqatar tyń ıdeıalar usynyldy.
Qorytyndysynda jeńimpazdar anyqtaldy. Jobanyń jalpy júlde qory 1 mln 140 myń teńgeni qurady. Jeńimpazdarǵa qarjylaı syıaqymen qatar bilim granttary tabystaldy. Mektep lıgasynyń úzdikteri Narxoz University-diń bilim granttaryn ıelendi. Al jekelegen qatysýshylarǵa sheteldik joǵary oqý oryndarynda oqý úshin jeńildikter berildi.
Aıta keteıik, elordada jas ǵalymdardyń halyqaralyq saıysy ótti.
