Jasandy ıntellekt pen saıasat: Shvetsııa premeriniń áreketi qoǵamda qyzý pikir týǵyzdy

ASTANA. KAZINFORM — Shvetsııa premer-mınıstri Ýlf Krıstersson saıası máseleler boıynsha ártúrli kózqarastar men balama oılardy salystyrý úshin jasandy ıntellektti, sonyń ishinde ChatGPT jáne frantsýzdyq LeChat sııaqty chat-bottardy únemi qoldanatynyn málimdedi. Bul týraly AZERTADJ jazdy.

Onyń aıtýynsha, jasandy ıntellekt oǵan jańa ıdeıalar týyndatýǵa jáne máselelerge balama kózqaraspen qaraýǵa múmkindik beredi.

Mundaı tehnologııalardy paıdalaný keıbir sarapshylardyń alańdaýshylyǵyn týǵyzǵan. Ýmeo ýnıversıtetiniń professory Vırdjınııa Dıgnýmnyń aıtýynsha, jasandy ıntellektige shamadan tys senim artý saıasatkerlerdiń qoǵam aldyndaǵy jaýapkershiligin tómendetýi múmkin. Onyń pikirinshe, JI — ózindik pikiri joq qural jáne tek ol jasaýshylar usynǵan derekterdi qaıta óńdeıdi.

— Másele mynada: sheshimdi shved halqy saılaǵan saıasatkerler qabyldaı ma, álde Kremnıı alqabyndaǵy tehnologııalyq alpaýyttar bizdiń bolashaǵymyzdy basqara ma? Ol qarapaıym máselelerde jasandy ıntellektige neǵurlym kóp súıense, soǵurlym bul júıege degen soqyr senim arta túsedi. Bul — óte taıǵaq jol. Biz qabyldanatyn sheshimderdiń shynaıylyǵy men senimdiligine kepildik berýdi talap etýimiz qajet — sizder ChatGPT úshin daýys bergen joqsyzdar ǵoı, — deıdi V. Dıgným.

Al Sedertern ýnıversıtetiniń medıatehnologııa professory Fransıs Lı premer-mınıstrdiń bul bastamasyna oń baǵa beredi. Onyń pikirinshe, JI-di qoldaný — adam óz ustanymdaryn syn kózben qarap, balama oılardy eskerýge múmkindik alatyn paıdaly qural.

Sonymen qatar, ol Shvetsııa men Eýropada ózderiniń tildik modelderin ázirleýdiń mańyzyn atap ótti. Bul — AQSh platformalaryna táýeldilikti azaıtyp, mádenı jáne saıası egemendikti saqtaý úshin qajet.

Osyǵan deıin habarlanǵandaı, Shvetsııada bıleýshi partııalar áıelderdiń qoldaýynan aıyrylyp jatyr.