Jasandy ıntellekt óndiristegi qaýipterdi aldyn ala anyqtaıdy

ASTANA. KAZINFORM — Qazaqstanda eńbek qaýipsizdigi salasynda jańa tásil engizilip jatyr. 

Endi jazataıym oqıǵalardy tek tirkeýmen shektelmeı, olardyń aldyn alýǵa basymdyq berilmek. Bul týraly Eńbek jáne halyqty áleýmettik qorǵaý vıtse-mınıstri Bahtııar Jazyqpaev málimdedi.

Onyń aıtýynsha, eńbek qaýipsizdigine kózqaras ózgerip jatyr. Buǵan deıin tekserýler kóbine buzýshylyqtardy anyqtaýǵa baǵyttalsa, endi qaýiptiń aldyn alýǵa mán beriledi.

— Qazir kelisimsharttar, tekserýler jáne jazataıym oqıǵalardy tergeý bir júıege biriktirildi. Sonyń negizinde eńbek táýekelderiniń tsıfrlyq kartasy jasaldy, — dedi ol.
Vıtse-mınıstrdiń sózinshe, bul karta qaýipti jaǵdaılardy aldyn ala anyqtaýǵa múmkindik beredi.
— Endi qaýip oqıǵa bolǵannan keıin emes, soǵan deıin baıqalady. Bul jumys oryndaryndaǵy qaýipsizdikti kúsheıtedi, — dedi Bahtııar Jazyqpaev.

Sonymen qatar júıege jasandy ıntellekt engizý josparlanyp otyr.

— Jasandy ıntellekt jazataıym oqıǵalardyń sebepterin saralap, olardyń aldyn ala boljaýǵa múmkindik beredi, — dedi ol.

Onyń aıtýynsha, mundaı tásil formaldy tekserýlerdi azaıtyp, naqty qaýipsizdikke basymdyq berýge jol ashady.

— Eń bastysy — qaǵaz júzindegi esep emes, jumys ornyndaǵy qaýipsizdik deńgeıin arttyrý, — dep atap ótti vıtse-mınıstr.

Budan buryn habarlanǵandaı, Eńbek mınıstrligi áleýmettik qyzmetterge baqylaýdy kúsheıtpek.