Jasandy ıntellekt olımpıadasyna otandyq demeýshilerdiń qyzyǵýshylyǵy artty
ASTANA. KAZINFORM — Qazaqstanda jasandy ıntellekt mamandaryna degen suranys tehnologııalyq naryq sheńberinen shyǵyp, qarjy sektoryna deıin ulasty. Bıyl Astanada ótetin halyqaralyq IOAI olımpıadasynda otandyq demeýshilerdiń úlesi alǵash ret sheteldik kompanııalardan asyp túsken. Bul týraly QR Sporttyq baǵdarlamalaý federatsııasynyń bas hatshysy Danabek Kalıajdarov Jibek Joly telearnasynyń «Búgin.LIVE» baǵdarlamasynda aıtyp berdi.
Buryn mundaı sharalarǵa Google, Meta sııaqty tek tehnologııalyq alpaýyttar qoldaý kórsetse, qazir qarjylyq sektor da talanttar úshin talasqa túsken.
— Aldyńǵy jyly Qazaqstanda bir ǵana otandyq kompanııa, 6 sheteldik kompanııa demeýshi bolǵan edi. Qazir kerisinshe otandyq demeýshiler basym. Bul biz úshin naryǵymyzdyń jetilip, talantty jastarǵa suranystyń kóbeıýin bildiredi, — dedi federatsııa ókili.
Sonymen qatar Danabek Kalıajdarov olımpıadanyń Astanaǵa aýysýy kezdeısoq emes ekendigin atap ótti.
— Birinshiden, bundaı jarystar jahandyq deńgeıdegi ıntegratsııanyń quraly. Ekinshiden, elimizde JI jyly jarııalanýymen dóp túsip otyr. Sondaı-aq sýperkompıýterdiń iske qosylýy jáne ınfraqurylymnyń daıyndyǵy halyqaralyq qaýymdastyqtyń senimin nyǵaıtty, — deıdi ol.
Qazirgi ýaqytta ulttyq quramany jasaqtaýdyń sheshýshi kezeńi júrip jatyr. 40 úzdik oqýshynyń ishinen 15-i iriktelip alynǵan. Eki aptalyq qarqyndy daıyndyqtan keıin tek 8 bala negizgi quramǵa enedi.
Eske sala keteıik, buǵan deıin, Sporttyq baǵdarlamalaý federatsııasynyń jetekshisi Baǵdat Mýsın Qazaqstanda Halyqaralyq jasandy ıntellekt olımpıadasyn (IOAI) ótkizý týraly kelisimshartqa qol qoıylǵanyn habarlaǵan edik.
