Jasandy ıntellekt Napoleonnyń 217 jyl buryn jazǵan qupııa hatyn ashty
ASTANA. KAZINFORM — Jasandy ıntellekt Napoleon Bonaparttyń 217 jyl boıy mazmuny belgisiz bolyp kelgen qupııa hatyn shıfrdan shyǵardy. Bul týraly The Telegraph gazetine silteme jasap, 24kg jazdy.
Basylymnyń málimetinshe, GPT-6 Astra neırojelisi Frantsııa ımperatory Napoleon Bonaparttyń 1809 jyly jazǵan qupııa hatyn oqýǵa múmkindik bergen.
Hat Napoleonnyń ógeı uly Ejen arqyly general Ogıýst de Marmonǵa jiberilgen. Onda Frantsııa men Gabsbýrg monarhııasy arasyndaǵy áskerı qaqtyǵys qarsańynda frantsýz jáne avstrııalyq áskerlerdiń ornalasýy men sany týraly málimetter bolǵan.
Hatty shıfrdan shyǵarýmen SentinelOne kompanııasynyń jasandy ıntellekt jónindegi ınjeneri Karter Cherch aınalysqan. Onyń aıtýynsha, neırojeli shamamen 1 300 tańbadan turatyn mátindi taldap, shıfrdyń krıptograftarǵa belgili elementterimen salystyrýǵa alty saǵattaı ýaqyt jumsaǵan.
Taldaý barysynda «ımıtatsııalyq kúıdirý» ádisi qoldanylǵan. Bul tásil arqyly júıe sózderdiń ártúrli nusqalaryn qarastyryp, alynǵan nátıjelerdi general Marmonnyń saqtalǵan ózge hattarymen salystyrǵan.
Shıfry sheshilgen hatta generalǵa joryqqa daıyndalý jáne «birneshe jasaqtan nemese tobyrdan» qoryqpaý tapsyrylǵan. Sondaı-aq hatta Avstrııaǵa «barlyq baǵyttan dereý shabýyl jasalatyny» aıtylǵan.
Dese de jaqynda Nobel syılyǵynyń laýreaty Djeffrı Hınton adamzat jasandy ıntellektini baqylaýdan shyǵaryp alýy múmkin ekenin aıtyp, dabyl qaqqan edi.
