Jasandy ıntellekt mınıstrligi jeke derekterdiń qorǵalýyna qatysty túsinik berdi
ASTANA. KAZINFORM — Búgin Úkimet otyrysynan keıingi baspasóz máslıhatynda Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın jelide derbes derekterdi zańsyz jınaý jáne taratý boıynsha qozǵalǵan qylmystyq iske qatysty pikir aıtty.
Onyń aıtýynsha, qazir bul is boıynsha tergeý amaldary júrip jatyr, sondyqtan oǵan qatysy barlar men derekterge qalaı qol jetkizilgeni týraly málimetter áli ashylmaǵan.
Vıtse-mınıstrdiń sózine qaraǵanda, jeke derekterdi zańsyz jınaý kóp jaǵdaıda fıshıngtik siltemeler, alaıaqtardyń qońyraý shalýy jáne paıdalanýshy derekterin jınaıtyn QR kodtary arqyly júzege asyrylatynyn atap ótti. Budan basqa, aqparattyń jınalýy jeke aqparattyq júıelerde, sonyń ishinde mıkroqarjy uıymdarynda tirkelgen.
Sonymen qatar ol qazirgi ýaqytta vedomstvo jeke derekterdi qorǵaý talaptaryn kúsheıtý boıynsha jumys júrgizip jatqanyn aıtty.
— Qazir aqparattyq júıelerdiń qaýipsizdigin qamtamasyz etpegeni úshin, sonyń ishinde jeke derekterge qatysty zańsyz áreketter úshin jazany qataıtý boıynsha qarqyndy jumys istep jatyrmyz. Bul turǵyda qomaqty somadaǵy aıyppul kiredi. Sondaı-aq jeke derekterdiń taralýyna tosqaýyl qoımaǵany úshin qylmystyq jazaǵa deıin jaýapkershilikti kúsheıtýdi qarastyryp jatyrmyz, — dedi R. Konıashkın.
Aıta keteıik, bıyl naýryzda UQK prokýratýra organdarynyń úılestirýimen Astana jáne Almaty qalalarynda QR azamattarynyń derbes derekterin zańsyz jınaýda jáne taratýda kúdikti adamdar toby áreketiniń jolyn kesti.
Tergeý materıaldary boıynsha qylmystyq is fıgýranttary zańsyz jolmen alynǵan aqparatty ınternet jelisinde satyp kelgen.
