Jasandy ıntellekt mınıstrligi jańa logotıpin tanystyrdy

ASTANA. KAZINFORM — Jasandy ıntellekt jáne tsıfrlyq damý mınıstrligi jańa logotıpin tanystyrdy. Logotıp Qazaqstannyń joǵary tehnologııalyq ári turaqty tsıfrlyq ekojúıesin qurýǵa baǵyttalǵan strategııalyq baǵytyn beıneleıdi. 

Sheńber — ulttyq mádenıet pen birliktiń negizi sanalatyn shańyraqty, sondaı-aq álemdik masshtab pen planetany bildiredi. Osylaısha Qazaqstannyń álemge ashyqtyǵyn aıqyndaıdy.

Sheńber ishindegi sharshy — ulttyq AI-ınfraqurylymynyń ózegin quraıtyn mıkrochıp pen sýperkompıýterlik júıelerdi bildiredi.

Tor — tsıfrlyq matrıtsany eske salady. Mundaǵy árbir uıashyq jalpy qozǵalystyń: memleket, bıznes, ǵylym men qoǵamnyń elementi.

Logotıp tústeri — dástúr sabaqtastyǵy men bolashaqqa umtylysty beıneleıdi.

— Jańa belgi joǵary tehnologııalar men ulttyq qundylyqtardyń sımvolıkasyn biriktire otyryp, Mınıstrliktiń (JI jáne tsıfrlandyrýdy turaqty damý men ortaq órkendeýdiń qozǵaýshy kúshi etý) mıssııasyn aıqyn kórsetedi, — dep jazdy vedomstvodan.

Eske sala keteıik, Memleket basshysy óz Joldaýynda «Jappaı tsıfrlandyrý jáne jasandy ıntellekt tehnologııasyn barynsha engizý arqyly ekonomıkany jańǵyrtýymyz kerek» degen edi. 

— Ol úshin, eń aldymen, Tsıfrlyq kodeksti tezirek qabyldaǵan jón. Bul zańda tsıfrlandyrý úderisiniń negizgi baǵyttary, sonyń ishinde jasandy ıntellekt, platformalyq ekonomıka, úlken derekqorlardy paıdalaný jáne basqa da máseleler aıqyndalýǵa tıis, — dedi. 

Artynsha Jasandy ıntellekt jáne tsıfrlyq damý mınıstrligi quryldy.