Jasandy ıntellekt memlekettik organdardyń jumysyn eki ese jeńildetedi
ASTANA. KAZINFORM – Jasandy ıntellekt azamattardyń memlekettik organdardan jaýap kútý ýaqytyn shamamen eki ese qysqartýǵa múmkindik beredi. Bul týraly elordada «Bolashaq beınesi: nátıjeden – jańa strategııaǵa» atty forýmda Q.AI kompanııasynyń bas dırektory Dmıtrıı Mýn málim etti.
Onyń aıtýynsha, memlekettik organdarǵa qazaqstandyqtardan jyl saıyn 6 mln-nan astam ótinish kelip túsedi. Bul rette ótinishterdi qarastyrý jumysy júıege júktemeni arttyryp jatyr.
— Qazir memlekettik organdarǵa azamattardyń saýaldaryn óńdeýge kómektesetin 15-ten astam túrli agent pen qyzmet túri jumys isteıdi. Jaqyn arada osy saýaldardyń shamamen jartysyn jasandy ıntellekt kómegimen avtomatty túrde óńdeý josparlanyp otyr. Munyń sebebine toqtalsaq, kelip túsetin saýaldardyń jartysynan kóbi aqparattyq sıpatqa ıe, ıaǵnı adamdar kóbinese zańnamaǵa nemese kúndelikti ómirde jıi kezdesetin jaǵdaılarǵa qatysty suraqtar qoıady, - dedi Dmıtrıı Mýn.
Sonymen qatar júıeden kelip túsken jaýap tolyqqandy bolmasa, onda ár adam máseleni ári qaraı qarastyrý úshin tikeleı memlekettik organǵa nemese laýazymdy qyzmetkerge onlaın rejımde saýal joldaı alady.
- Osylaısha, jaqyn arada jasandy ıntellekt azamattardyń memlekettik organdardan jaýap kútý ýaqytyn shamamen eki ese qysqartýǵa múmkindik beredi, - dedi ol.
Buǵan deıin habarlanǵandaı, bıyl elde jasandy ıntellekt ýnıversıteti stýdentterdi oqytýdy bastaıdy.
