Jasandy ıntellekt memlekettik organdardyń jumys tıimdiligin arttyrady - Memleket basshysy

ASTANA. KAZINFORM – Qasym-Jomart Toqaevtyń pikirinshe, jasandy ıntellekt memlekettik organdardyń jumys tıimdiligin arttyrady.

– Qazir ChatGPT qaǵıdatymen jumys isteıtin keıbir jobalar engizilip jatyr. Bul tásilder azamattardyń ótinishterine jaýap berýge septigin tıgizýde. Degenmen muny aldaǵy úlken jumystyń alǵashqy qadamy ǵana deýge bolady. Ozyq tehnologııanyń áleýeti budan áldeqaıda joǵary. Jasandy ıntellekt memlekettik apparattyń jumysyn meılinshe jeńildetýi kerek. Bul – óte mańyzdy mindet. Qazaqstanda qyzmetterdiń basym bóligi áli de «tsıfrlyq fıksatsııa» kúıinde. ıAǵnı qujattar elektrondy túrde beriledi, óńdeledi, biraq rásimdeýdiń ózi memlekettik qyzmetshiniń aralasýyn talap etedi. Shyn máninde, bul – qaǵaz júzindegi bıýrokratııany tsıfrlyq formatqa kóshirý ǵana. Budan tıimdilik esh artqan joq. Biz jasandy ıntellektini qoldanyp, qandaı qyzmetterdi tolyq ózgertýge bolatynyn naqty aıqyndap alýymyz kerek. Al odan bosaǵan resýrstardy basqa da kúrdeli ári paıdaly jumystarǵa jumsaýǵa bolady. Sondyqtan Úkimet úsh aıdyń ishinde memlekettik qyzmet kórsetý salasyna jasandy ıntellektini engizý boıynsha naqty sharalar ázirleýi kerek. Ásirese, ótinishterdi qaraý jáne sheshim qabyldaý jumysynda keńinen paıdalanǵan jón. Bizge tutas memlekettik basqarý júıesinde qoldanýǵa bolatyn naqty tetikter óte qajet, – dedi Qasym-Jomart Toqaev.

Memleket basshysy densaýlyq saqtaý salasynda jasandy ıntellekt tehnologııasyn paıdalanýdyń mańyzyna nazar aýdardy. Onyń aıtýynsha, medıtsına salasynda aýqymdy aqparat jınaqtalǵan. Jasandy ıntellekt kómegimen olardyń negizinde durys dıagnoz qoıýǵa, em-shara taǵaıyndaýǵa jáne naýqastarǵa monıtorıng júrgizýge arnalǵan quraldar daıyndaýǵa bolady. 

– Álemde dárigerlerdi kúndelikti birsaryndy jumystan bosatyp, olardyń mańyzdy klınıkalyq sheshimder qabyldaýyna múmkindik beretin tehnologııalar belsendi qoldanylady. Qazaqstanda da perspektıvti medıtsınalyq startaptar bar. Alaıda bıýrokratııa olardyń áleýetin shektep otyr. Bir jaǵynan elimizdegi medıtsınalyq aqparat júıelerinde birtutas algorıtm joq, árqaısysy derbes damyp jatyr. Bul jasandy ıntellektiniń medıtsına salasyna engizilýin tejeıdi. Densaýlyq saqtaý salasyn tsıfrlandyrý isindegi júıesizdik túrli zańbuzýshylyqtarǵa jol berýde. Mysaly, byltyr áleýmettik medıtsınalyq saqtandyrý qoryna aýdıt júrgizildi. Sol kezde qomaqty qarajattyń shyǵyn bolǵany anyqtaldy. Tsıfrlyq tásilder medıtsına salasynyń ashyq jáne tıimdi qyzmet etýine yqpal etedi,– dedi Prezıdent.

Aıta keteıik, Qasym-Jomart Toqaev jasandy ıntellekt týraly tıisti zańdy qabyldaý – shuǵyl mindet ekenin aıtty.