Jasandy ıntellekt memlekettik bıýdjettiń kirisi men shyǵysyn boljaýǵa qalaı kómektesedi
ASTANA. KAZINFORM — Ozyq tehnologııalar kemshilikterdi túzetip, artyqshylyqtardy arttyrýǵa múmkindik beredi. Memleket basshysy Qasym-Jomart Toqaev ta búgin jarııalaǵan «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda osy múmkindikterdi atap ótip, tsıfrlyq sheshimderdi memlekettik basqarý salasynda keńinen qoldanýdy tapsyrdy.
Prezıdent jasandy ıntellekt múmkindikterin, ásirese bıýdjetti qalyptastyrý isinde jan-jaqty pysyqtaýdy júktedi.
Osyǵan oraı Qarjy mınıstrliginiń ókilderi bul baǵytta atqarylyp jatqan jumystar týraly málimet berdi.
— Memlekettik qarjynyń tsıfrlyq kartasy men Bıznestiń tsıfrlyq kartasyn paıdalaný bıýdjet kiristeri men shyǵystaryn boljaýdy jetildirýge múmkindik beredi. Qarjy mınıstrligine qarasty Elektrondyq qarjy ortalyǵynyń mamandarynyń aıtýynsha, zamanaýı analıtıkalyq modelder ártúrli kózderden alynǵan derekterdi biriktirip, óńirlerdiń qarjylyq jaǵdaıyn tereńirek baǵalaýǵa, bıýdjet túsimderi men shyǵystaryna áser etetin faktorlardy anyqtaýǵa jáne basqarý sheshimderin qabyldaýǵa qajetti boljamdar ázirleýge kómektesedi, — dedi Qarjy mınıstrligine qarasty Elektrondyq qarjy ortalyǵynyń mamandary.
Óńirlerdiń qarjylyq kórsetkishteri taldanady
Vedomstvo ókilderiniń túsindirýinshe, Memlekettik qarjynyń tsıfrlyq kartasy óńirlerdiń qarjylyq kórsetkishterin vızýalızatsııalaýǵa jáne taldaýǵa múmkindik beredi. Onyń kómegimen aýmaqtar arasyndaǵy aıyrmashylyqtardy baǵalap, qoljetimdi kórsetkishterdiń ózgerisin baqylaýǵa bolady.
Kartografııalyq vızýalızatsııa óńirlerdegi qarjylyq jaǵdaıdy jan-jaqty taldap, tıisti sheshimder qabyldaýǵa qajetti aqparattyq negiz qalyptastyrýǵa yqpal etedi. Osylaısha, tsıfrlyq karta josparlaý kezinde derekterdiń kórnekiligi men qoljetimdiligin arttyratyn analıtıkalyq qural retinde qoldanylady.
Bıznes derekteri bıýdjet boljamyn tolyqtyrady
Elektrondyq qarjy ortalyǵynyń mamandary «Bıznestiń tsıfrlyq kartasy» qarjylyq taldaýdy kásipkerlik qyzmetke, bıznestiń óńirler boıynsha ornalasýyna jáne memlekettik qoldaý sharalaryna qatysty aqparatpen tolyqtyrýǵa arnalǵanyn atap ótti.
— Bıznestiń derekterin óńirlik qarjylyq kórsetkishtermen birge paıdalaný belgili bir aýmaqtyń ekonomıkalyq belsendiligin baǵalaýǵa jáne onyń bıýdjet túsimderimen ózara baılanysyn zerdeleýge qosymsha múmkindik beredi, — dep túsindirdi ortalyq mamandary.
Jasandy ıntellekt boljamdy stsenarııler ázirleýge kómektesedi
Elektrondyq qarjy ortalyǵy ókilderiniń aıtýynsha, mashınalyq oqytý ádisterin qoldaný tarıhı derekterdegi zańdylyqtardy anyqtaýǵa, makroekonomıkalyq kórsetkishterdiń áserin baǵalaýǵa jáne bıýdjet kirisiniń jekelegen kózderi men shyǵystar baǵyttary boıynsha boljamdy stsenarııler ázirleýge múmkindik beredi.
Kiristerdi boljaý kezinde salyq túsimderiniń dınamıkasy, sonyń ishinde korporatıvtik tabys salyǵy men qosylǵan qun salyǵy, sondaı-aq makroekonomıkalyq faktorlardyń salyq bazasyna yqpaly taldanýy múmkin. Bul túsimderdiń yqtımal ózgeristerin baǵalap, bıýdjettiń atqarylýyna áser etýi múmkin faktorlardy anyqtaýǵa kómektesedi.
— Al shyǵystardy boljaý kezinde olardyń burynǵy dınamıkasy, maýsymdyq ózgeristeri, bıýdjet mindettemeleri jáne qarjylandyrý qajettiligine yqpal etetin basqa da faktorlar eskeriledi. Mashınalyq oqytý modelderi shyǵystardaǵy zańdylyqtardy zerttep, mamandardyń keıingi taldaýyna arnalǵan boljamdy baǵalaýlardy qalyptastyrýǵa múmkindik beredi, — dedi ortalyq mamandary.
Ortalyq mamandarynyń pikirinshe, memlekettik bıýdjet kiristeri men shyǵystarynyń boljamdy modelderin ázirleýde tarıhı derekterdi, makroekonomıkalyq ındıkatorlardy, óńirlik qarjylyq kórsetkishterdi jáne kásipkerlik belsendilik týraly málimetterdi keshendi paıdalaný perspektıvaly baǵyttardyń biri sanalady.
— Jasandy ıntellekt tehnologııalary turaqty zańdylyqtardy anyqtaýǵa, túrli faktorlardyń áserin baǵalaýǵa, boljamdy stsenarıılerdi salystyrýǵa jáne mamandarǵa boljamdy aýytqýlarǵa ýaqtyly nazar aýdarýǵa kómektesedi. Sonymen qatar boljamdardyń sapasy bastapqy derekterdiń tolyqtyǵy men senimdiligine, ádisnamanyń durystyǵyna jáne nátıjelerdiń únemi tekserilýine baılanysty, — dep túıindedi ortalyq qyzmetkerleri.
Demek, atalǵan jobalardy damytý memlekettik qarjy júıesin jan-jaqty taldaýǵa múmkindik beredi. Jasandy ıntellekt quraldaryn kezeń-kezeńimen engizý boljam jasaý múmkindikterin keńeıtip, analıtıkalyq qorytyndylardyń negizdiligin arttyrýǵa jáne memlekettik qarjy salasynda tıimdi sheshimder qabyldaýǵa yqpal etedi.
Buǵan deıin Kazinform Prezıdent Qasym-Jomart Toqaevtyń Joldaýynyń tolyq mátinin jarııalanǵan edi.
