Jasandy ıntellekt medıtsınada dıagnoz qoıýda adamnan ozyp ketti

ASTANA. KAZINFORM – Garvard jáne Stenford ýnıversıtetteri ǵalymdarynyń birlesken zertteýine sáıkes, jasandy ıntellekt adamdarǵa qaraǵanda dálirek dıagnoz qoıa alady, dep habarlaıdy AZERTADJ.

— Jansaqtaý bóliminde patsıent qabyldaý kezinde jasandy ıntellekttiń dıagnoz qoıý dáldigi 79,7 paıyzǵa jetti, al úzdik mamandarda bul kórsetkish 75,9 paıyz boldy. Jasandy ıntellekt ásirese ýaqyty shekteýli, aýrý tarıhyn tolyq taldaýǵa múmkindik joq kúrdeli jaǵdaılarda jaqsy jumys istedi, — delingen zertteý nátıjesinde.

Qate qoıylǵan dıagnozdar saldarynan álemde shamamen 10 paıyz naýqas qaıtys bolýy múmkin. Al AQSh-ta durys qoıylmaǵan dıagnozdar ólim sebepteri arasynda aldyńǵy oryndardyń birin alady. Osyǵan baılanysty zertteýshiler dıagnoz qoıýda kómek retinde jasandy ıntellektini engizýge tyrysty, ony keńesshi retinde qarastyrdy. Alaıda bul dıagnostıka sapasyn jaqsartqan joq, sebebi dárigerler kóbinese jasandy ıntellekt qorytyndylaryna senbeıdi.

Buǵan deıin Almatydaǵy Kardıologııa jáne ishki aýrýlar ǵylymı‑zertteý ınstıtýty koronarlyq arterııalardy zertteýge arnalǵan jasandy ıntellekti bar jańa býyn tamyrishilik ýltradybys (TІÝDZ) júıesin klınıkalyq tájirıbege engizgenin jazǵanbyz.