Jasandy ıntellekt Qurandaǵy keıbir sózderdi burmalap jiberýi múmkin - Tatarstan múftıi
ASTANA. KAZINFORM – Tatarstannyń múftıi Kamıl Samıgýllın Qazaqstan Prezıdentiniń Jasandy ıntellektini damytý etıkasy jónindegi komıssııa qurý týraly usynysyna pikir aıtty.
Onyń aıtýynsha, bul mańyzdy bastama, óıtkeni qazirgi ýaqytta jastar men qoǵamda jasandy ıntellektige qatysty túrli túsinik qalyptastyp jatyr.
— Jalpy, ınternet múmkindigin keńinen paıdalanamyn, sondaı-aq jasandy ıntellektimen de jumys isteý áreketteri boldy. Ony qosymsha qural retinde paıdalansa, paıdaly bolýy múmkin. Biraq, kóbine aıattarǵa qatysty suraý salsaq, burmalaıtyn nemese qosyp jiberetin tustary bolady. Qurandy jatqa biletin adam retinde onyń keıbir sózderdi almastyrǵanyn birden baıqaısyń jáne osy jaǵdaı bizdi oılandyrady, - dedi Kamıl Samıgýllın Álemdik jáne dástúrli dinder kóshbasshylarynyń Cezi kezinde tilshiler suraǵyna jaýap bere otyryp.
Osy oraıda ol dinı máseleler boıynsha jasandy ıntellektiden qandaı da bir jaýap alýǵa umtylmaý kerek ekenin aıtty. Bul turǵyda dinı máselede jasandy ıntellekt jumysyn naqty rettep, reglamenttegen jón.
- Musylmandyq turǵysynan moraldyq normalar burynnan qalyptasqan, ıaǵnı barlyǵyn biriktiretin belgili erejeler bar, - dedi qosty Tatarstan múftıi.
Aıta keteıik, Álemdik jáne dástúrli dinder kóshbasshylary VIII Seziniń jalpy otyrysynda Memleket basshysy Qasym-Jomart Toqaev jasandy ıntellektini damytý etıkasy jónindegi dinaralyq komıssııa qurýdy usyndy.
Ol neırojeliler men basqa da serpindi tehnologııalardy jaýapkershilikpen paıdalanýdyń ámbebap qaǵıdattaryn ázirleýmen aınalysady.