Jasandy ıntellekt kómegimen jasalǵan ıkona qasıetti dep tanyldy
ASTANA. KAZINFORM — Belarýste jasandy ıntellekt kómegimen jasalǵan ıkonaǵa qasıetti rásim jasaldy. Rásim 11 qazanda Novolýkoml qalasyndaǵy Áýlıe Marııa Magdalına shirkeýinde ótti. Bul — eldegi jáne álemdegi Katolık shirkeýi úshin ázirge erekshe sanalatyn qasıetti Karlo Akýtıstiń beınesi, dep habarlaıdy Kazinform Katolık shirkeýiniń portalyna silteme jasap.
Jańa ıkonaǵa arhıepıskop-emerıt Tadeýsh Kondrýsevıch bata berdi. Bul týraly ksendz Nıkolaı Lıpskıı messa kezinde júrgizilgen onlaın-translıatsııa barysynda habarlady.
Áýlıeniń beınesi búıirdegi qurbandyq ústeliniń janyna ornalastyryldy. Ol Áýlıe Marııa Magdalına ıkonasynyń perdesi retinde paıdalanylmaq.
Lıpskııdiń aıtýynsha, bul eki beıne hrıstıandyqtyń alǵashqy ǵasyrlaryndaǵy Іnjil tarıhyn qazirgi tsıfrlyq qoǵamnyń qajettilikterimen baılanystyrady.
Karlo Akýtısti «kıber-apostol», ınternet pen jastardyń qamqorshysy dep ataıdy. Ol katolık dinin taratý úshin ınternetti paıdalanyp, evharıstııalyq ǵajaıyptardyń onlaın-katalogyn jasaǵan. Akýtıs 2006 jyly 15 jasynda leıkozdan qaıtys boldy. Ol 2025 jyly kanonızatsııalanyp, áýlıeler qataryna qosyldy.
Bul bastama dindarlar arasynda ártúrli pikir týǵyzdy. Áleýmettik jelilerde keıbir qoldanýshylar JI jasaǵan beıneni ıkona dep sanaýǵa jáne onyń aldynda minájat etýge bolatynyna kúmán keltirdi.
Aıta keteıik, SQO-ǵa kelgen katolıkter qazaq beınesindegi ıkonaǵa minájat etedi.
