Jasandy ıntellekti qazirgi zamannyń myqty quraly, tipti, qarýy - Prezıdent
ASTANA. KAZINFORM – Qasym-Jomart Toqaev jasandy ıntellektini jaýapkershilikpen qoldaný mádenıetin ilgeriletýdiń mańyzy zor ekenin aıtty, dep jazady Aqorda.
– Jasandy ıntellekt – jahandyq qubylys. Eshbir memleket onyń áleýetin jalǵyz ózi tolyq paıdalana almaıdy. Bizge halyqaralyq deńgeıdegi bilim almasý, birlesken zertteýler, ınvestıtsııalar qajet. Tehnologııalyq yntymaqtastyq pen kadrlyq áleýetti damytqan jón. Qazaqstan jasandy ıntellektini beıbit maqsatta, qaýipsiz ári jaýapkershilikpen ilgeriletýdi dáıekti túrde qoldaıdy. Tehnologııa adamǵa qyzmet etip, órkenıettiń katalızatory bolýy kerek. Biz osy ustanymnan aınymaımyz. Jasandy ıntellekt jikke bólmeýi qajet. Tehnologııalyq kedergiler elderdiń arasyn alshaqtatyp, damýymyzdy baıaýlatady. Sondyqtan búginde ǵylymı-tehnıkalyq yntymaqtastyqtyń qalyptasqan arnalaryn saqtaý óte ózekti. Halyqaralyq yqpaldastyqqa qatysty kózqarasymyz ulttyq múddelerdi qurmetteý jáne tehnologııany beıbit maqsatta qoldaný qaǵıdasyna negizdeledi, – dedi Memleket basshysy.
Prezıdent jasandy ıntellektiniń múmkindigi molaıa túsken saıyn, onyń qaýpi de artady dep paıymdaıdy.
– Kıberqaýipsizdik, derekterdi qorǵaý, aqparattyń senimdiligi, algorıtmderdiń ashyqtyǵy, qabyldanatyn sheshimder úshin jaýapkershilik – munyń bári kezek kúttirmeı qaralýǵa tıis máseleler. Shyn máninde, jasandy ıntellektini qazirgi zamannyń myqty quraly, tipti, qarýy dep te aıtýǵa bolady. Sondyqtan onyń álemdik damýǵa paıda nemese zııan ákelýi eń aldymen adamzatqa tikeleı baılanysty bolmaq, – dedi Qasym-Jomart Toqaev.
Aıta keteıik, Toqaev ótken jyly qazaqstandyq IT-qyzmetter eksporty 1 mıllıard dollardan asqanyn habarlady.
