Jasandy ıntellekt qazaqtyń tarıhy men salt-dástúrin qanshalyqty biledi
ASTANA. KAZINFORM — Jasandy ıntellektiniń qazaq halqynyń tarıhy, salt-dástúri men mádenıetin qanshalyqty biletini arnaıy synaq arqyly tekserildi.
Bul týraly Halyqaralyq «Qazaq tili» qoǵamy men OpenAI kompanııasynyń birlesken jobasynyń nátıjelerin tanystyrý kezinde joba jetekshisi Anar Qurmanjanqyzy aıtyp berdi.
Onyń aıtýynsha, jasandy ıntellektiniń qazaq tilinde durys sóıleýi ǵana jetkiliksiz. Ol qazaqtyń tarıhyn, dástúrin, turmys-tirshiligin jáne mádenı erekshelikterin de túsinýi kerek.
— Osyny tekserý úshin 500 suraqtan turatyn arnaıy tapsyrmalar jınaǵy ázirlengen. Suraqtar qazaq halqynyń tarıhy, salt-dástúri, mádenıeti men etnografııasyna qatysty. Osy synaqtan GPT-5.6 Terra modeli de ótti. Onyń durys jaýap berý kórsetkishi 35,92%-dy qurady, — dedi spıker.
Osylaısha, onyń sózinshe, synaq nátıjesi jasandy ıntellektiniń qazaq tilimen qatar, qazaq halqynyń tarıhy men mádenıetin qanshalyqty meńgergenin de baǵalaýǵa múmkindik beredi.
— Jasandy ıntellektini tekserýge arnalǵan júıede budan bólek qazaq tilindegi mátindi túsiný, grammatıkany durys qoldaný, tabıǵı sóıleý, maqal-mátelder men turaqty tirkesterdi paıdalaný, aýdarma jasaý jáne qaýipsiz jaýap berý qabileti de baǵalanady. Baǵalaý júıesi aǵylshyn tilinen aýdarylmaı, qazaq tiliniń tildik jáne mádenı erekshelikterin eskere otyryp, tikeleı qazaq tilinde qurastyryldy, — dedi Anar Qurmanjanqyzy.
Aldaǵy ýaqytta 500 suraqtan turatyn bul synaq júıesin ǵalymdar men zertteýshilerge qoljetimdi etý josparlanyp otyr.
Aıta keteıik, buǵan deıin Astanada qazaq tilinen eresekterge arnalǵan tegin kýrs ótetini habarlandy.
