Jasandy ıntellekt Qazaqstandaǵy jumys oryndaryn azaıta ma - Jaslan Mádıev jaýaby
ALMATY. KAZINFORM – Digital Almaty forýmy aıasynda Jaslan Mádıev jasandy ıntellektiniń qazaqstandyqtardyń ómirine áseri týraly pikir bildirdi.
QR Tsıfrlyq damý, ınnovatsııalar jáne aeroǵarysh ónerkásibi mınıstriniń aıtýynsha, jasandy ıntellektiniń jumys oryndaryna qanshalyqty áser etetini qazirgi ýaqytta zerttelý ústinde.
- Biz ózge elder sekildi jasandy ıntellekt damýynyń áserine zertteý júrgizip jatyrmyz. Jumys oryndary týraly suraq barlyq memleket úshin aldaǵy orynda tur. Álemdik sarapshylardyń aıtýynsha, jasandy ıntellekt ekonomıkanyń tıimdiligin arttyrady, kompanııalardyń ónimi ósedi. Ol óz kezeginde kásiporynnyń tabysyn kóbeıtedi. Tabys kóbeıgen kezde qosymsha jumys oryndary ashylady. Biraq mamandardy qaıta daıarlaý baǵdarlamasy bolýy kerek. Biz bul baǵytta jumys istep jatyrmyz. Mysaly, byltyr Astana hab bazasynda Tomorrow school mektebi ashyldy. Onda stýdentter men jasy úlken kisiler JI tehnologııasyn qoldanýdy úırene alady, - dedi mınıstr.
Jaslan Mádıev jasandy ıntellekt aldaǵy ýaqytta joǵary deńgeıde damıtyn bolsa, 5 kúndik jumysty 3 kúnde bitirýge bolatynyn atap ótti.
- Jasandy ıntellekt birinshi kezekte qaıtalatyn qyzmetterdi avtomattandyrýǵa kómektesedi. ıAǵnı, adamdardy qaıtalanatyn jumystardan bosaıdy. Álemdik sarapshylardyń tujyrymynsha, eger ekonomıka jasandy ıntellekt negizinde damysa, 5 kúndik jumysty 3 kúnde bitirýge bolady. Al adamdardyń ózi men otbasyna, shyǵarmashylyqqa bóletin ýaqyty artady. Biraq jumys nátıjesi týra sondaı bolady, - dedi vedomstvo basshysy.
Eske salaıyq, buǵan deıin jasandy ıntellektiniń jahandyq ekonomıkaǵa úlesi 20 trln dollarǵa jetýi múmkin ekenin jazǵanbyz.