Jasandy ıntellekt Qazaqstandaǵy bilim sapasyn arttyrady – qyrǵyzstandyq sarapshylar
ASTANA. KAZINFORM – Jasandy ıntellektti Qazaqstannyń bilim berý júıesine engizý oqýshylar men muǵalimder úshin jańa múmkindikter ashady. Bul tek tsıfrlandyrý emes, zamanaýı bilim berý ortasyn qalyptastyrýǵa baǵyttalǵan bastama. Mundaı pikirdi Bishkekte Kazinform agenttiginiń menshikti tilshisine bergen suhbatynda Qyrǵyzstan sarapshylary aıtty.
Ekonomıka ǵylymdarynyń doktory Tolonbek Abdyrovtyń aıtýynsha, bul bastamanyń negizgi maqsaty – bilim sapasyn arttyrý jáne oqytýdy ár oqýshynyń deńgeıine saı beıimdep, qoljetimdi etý. Bul qala men aýyl mektepteri arasyndaǵy teńsizdikti azaıtýǵa múmkindik beredi.
– Jasandy ıntellekt oqýshylardyń bilimindegi olqylyqtardy anyqtap, olardyń deńgeıine sáıkes tapsyrmalar usynýǵa múmkindik beredi. Sondaı-aq ol muǵalimderdiń jumysyn jeńildetip, oqý úderisin tıimdirek etýge jaǵdaı jasaıdy. Sonymen qatar qujat mektepterdiń tehnıkalyq jabdyqtalýyn, turaqty ınternettiń bolýyn, muǵalimderdiń daıarlyǵyn jáne oqýshylardyń jeke derekteriniń qorǵalýyn qamtıdy, - dedi ol.
Sarapshynyń pikirinshe, bul protsess tek tsıfrlandyrýmen shektelmeıdi. Tehnologııalar oqytýdyń sapasyn jaqsartady jáne elde zamanaýı bilim berý júıesiniń damýyna yqpal etedi.
– Eger bastama sapaly júzege assa, ol qala men aýyl mektepteri arasyndaǵy alshaqtyqty azaıtyp, oqýshylardyń daıyndyq deńgeıin arttyryp, adamı kapıtaldy damytýǵa negiz bola alady, - dedi Tolonbek Abdyrov.
Halyqaralyq qatynastar jónindegi sarapshy Baıqadam Quramaevtyń pikirinshe, bul bastama jastarǵa zamanaýı tehnologııalar arqyly sapaly bilim alýǵa múmkindik beredi.
– Bul Qazaqstannyń ıntellektýaldyq tehnologııalardy damytýdaǵy álemdik úrdisterge saı keletin bastamasy. Jasandy ıntellekt aldaǵy 10–15 jylda bolashaq mamandyqtardyń qalyptasýyna tikeleı áser etedi, - dedi ol.
Sarapshynyń aıtýynsha, bilim berý salasyna jasandy ıntellektti engizý Qazaqstannyń jahandyq tehnologııalyq ózgeristerge beıimdelýine yqpal etedi.
Aıta keteıik, Prezıdent orta bilim berý júıesine jasandy ıntellektini engizý týraly Jarlyqqa qol qoıdy.
