Jasandy ıntellekt qazaqsha jańalyqtardy ym tiline aýdarady
ASTANA. KAZINFORM – L.N. Gýmılev atyndaǵy Eýrazııa ulttyq ýnıversıteti qazaq tilindegi medıamaterıaldardy avtomatty túrde ym tiline aýdaratyn SignBridge AI júıesin ázirlep jatyr. Bul týraly Ǵylym jáne joǵary bilim vıtse-mınıstri Dınara Şeglova Ortalyq kommýnıkatsııalar qyzmetinde ótken baspasóz máslıhatynda aıtty.
Onyń sózinshe, búginde qazaqstandyq joǵary oqý oryndary jasandy ıntellektini oqytýmen ǵana shektelmeı, túrli salaǵa arnalǵan óz tsıfrlyq ónimderin ázirleýge kóshken.
— Eýrazııa ulttyq ýnıversıteti qazaq tilindegi medıamaterıaldardy avtomatty túrde ym tiline aýdaratyn SignBridge AI júıesin engizip jatyr. Bul joba qazirdiń ózinde Jibek Joly telearnasynda qoldanylady, — dedi Dınara Şeglova.
Vıtse-mınıstrdiń aıtýynsha, joǵary oqý oryndary ázirlegen jasandy ıntellekt jobalary bilim berý, medıtsına, óndiris, týrızm, qarjy jáne tsıfrlyq qaýipsizdik salalarynda da qoldanys taýyp otyr.
Máselen, Astana IT University kún panelderindegi aqaýlardy drondardyń kómegimen anyqtaıtyn EnergyDronesAI júıesin ázirlegen. Al Shyǵys Qazaqstan tehnıkalyq ýnıversıteti shahtalardaǵy qozǵalysty baqylaýǵa jáne óndiristik qaýipsizdikti qamtamasyz etýge arnalǵan Smart Safety Monitor júıesin jasap shyǵarǵan. Bul joba Dúnıejúzilik banktiń granttyq qoldaýyna ıe bolǵan.
Sonymen qatar Astana medıtsına ýnıversıteti telemedıtsınaǵa arnalǵan ZhanCare.AI platformasyn iske asyryp jatyr. Al Astana IT University transplantologııa salasyndaǵy dárigerlerdiń jumysyn qoldaýǵa arnalǵan CortexAI júıesin ázirleý ústinde. Joba Saýd Arabııasynyń halyqaralyq grantyn jeńip alǵan.
Aıta keteıik, buǵan deıin Ǵylym jáne joǵary bilim mınıstrligi júrgizgen zertteý nátıjesinde Qazaqstandaǵy jumys kúshiniń shamamen 70 paıyzynda jasandy ıntellektiniń kómegimen eńbek ónimdiligin arttyrýǵa múmkindik bar ekeni anyqtalǵan bolatyn.
