Jasandy ıntellekt eńbek naryǵyn ózgertedi – zertteý
ASTANA. KAZINFORM – Jasandy ıntellekt ekonomıka men eńbek naryǵyn ózgertetin negizgi faktorlardyń birine aınalyp keledi. Bul týraly Ǵylym jáne joǵary bilim vıtse-mınıstri Dınara Şeglova Ortalyq kommýnıkatsııalar qyzmetinde ótken baspasóz máslıhatynda aıtty.
Onyń aıtýynsha, 2025 jyly Ǵylym jáne joǵary bilim mınıstrligi QS Quacquarelli Symonds halyqaralyq taldaý agenttigimen birlesip, jasandy ıntellektiniń eńbek naryǵy men kadr daıarlaý júıesine yqpalyn zerttegen.
Zertteý nátıjesine sáıkes, Qazaqstandaǵy jumys kúshiniń shamamen 70%-ynda jasandy ıntellektini qoldaný arqyly eńbek ónimdiligin arttyrýǵa ortasha nemese joǵary múmkindik bar. Sonymen qatar mamandyqtardyń 53%-dan astamynda jekelegen mindetterdi ishinara avtomattandyrýǵa jaǵdaı jasalǵan.
— Bul adamnyń ornyn tehnologııa almastyrady degendi bildirmeıdi. Áńgime eńbek sıpatynyń, sondaı-aq mamandardyń daǵdylary men quzyretterine qoıylatyn talaptardyń ózgerýi týraly bolyp otyr, — dedi Dınara Şeglova.
Vıtse-mınıstrdiń sózinshe, zertteýdiń negizgi qorytyndylarynyń biri – jasandy ıntellektige negizdelgen ekonomıkaǵa kóshý úshin joǵary bilimdi mamandardyń biliktiligin arttyrý jáne qaıta daıarlaý qarqynyn shamamen úsh ese jedeldetý qajettigi.
Buǵan deıin barlyq joǵary oqý ornynda stýdentterge jasandy ıntellekt pánin oqytý engiziletini habarlanǵan edi.
