Jasandy ıntellekt eńbek kitapshalaryn oqyp, zeınetaqy taǵaıyndaýǵa qatysady
ASTANA. KAZINFORM — Jyl sońyna deıin áleýmettik-eńbek salasynda jasandy ıntellektini taǵy bes baǵyt boıynsha engizý josparlanyp otyr. Bul týraly Eńbek jáne halyqty áleýmettik qorǵaý mınıstri Asqarbek Ertaev Úkimet otyrysynda málim etti.
Mınıstrdiń aıtýynsha, úshinshi toqsanda jasandy ıntellekt jumyspen qamtýǵa járdemdesýdiń belsendi sharalaryna joldama berý kezinde qoldanyla bastaıdy.
— Júıe jumys izdeýshiniń derekterin avtomatty túrde taldap, onyń biliktiligi men qajettilikterine sáıkes qoldaý sharalaryn irikteıdi. Jumys izdeýshiniń sáıkestigin baǵalaý, qajetti qoldaý quraldaryn tańdaý jáne azamattyń beıinine qaraı jeke usynymdar qalyptastyrý josparlanyp otyr, — dedi Asqarbek Ertaev.
Sondaı-aq JI kásibı eńbekke qabilettilikten aıyrylý dárejesin aıqyndaýda da qoldanylady. Bul rette júıe medıtsınalyq derekterdi taldap, azamattyń eńbekke qabiletin joǵaltý deńgeıin eskere otyryp, sheshim jobasyn ázirleıdi.
Al tórtinshi toqsanda skanerlengen eńbek kitapshalaryn avtomatty túrde taný tehnologııasyn engizý josparlanǵan. Sonymen birge jasyna baılanysty zeınetaqy tólemderin taǵaıyndaý kezinde usynymdar qalyptastyrýǵa JI qatysady.
Budan bólek, vedomstvo kásiporyndardaǵy eńbek qaýipsizdigi salasyna da JI engizýdi kózdep otyr. Jańa júıe óndiristegi eńbek táýekelderin taldap, qaýipsizdik talaptarynyń buzylýy múmkin baǵyttardy aldyn ala anyqtaýǵa múmkindik beredi.
— Biz jekelegen ótinishtermen jumys isteýden azamattardyń ómirlik jaǵdaılaryn súıemeldeýge birtindep kóship jatyrmyz. Biz úshin negizgi nátıje rásimder sany emes, naqty adamǵa qajetti kómektiń ýaqtyly jáne ataýly túrde kórsetilýi mańyzdy, — dedi Asqarbek Ertaev.
Buǵan deıin Eńbek mınıstri ataýly áleýmettik kómekke muqtajdardy, múgedektik toptaryn JI anyqtaıtynyn aıtqan edi.
