Jasandy ıntellekt elektr energııasy salasyna qalaı áser etedi
ASTANA. KAZINFORM — Qazaqstandaǵy elektr energııasyn berý jelilerin tekserý júıesine ózgeris engiziledi. Bul týraly Úkimet otyrysynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi.
- Elektr energetıkasyn damytý men tsıfrlandyrý energııany óndirý, bólý jáne tutyný tıimdiligin arttyrady. Memleket basshysynyń tapsyrmasy boıynsha Jasandy ıntellekt mınıstrligi Energetıka mınıstrligimen birlese Tsıfrlyq transformatsııa kartasyn bekitti. Ol Smart Grid, tsıfrlyq egizder, monıtorıng júıeleri jáne jasandy ıntellektige negizdelgen boljaý tehnologııalaryn engizý kezeńderin aıqyndaıdy. Energetıka salasynda qosalqy túrlerimen birge 43 memlekettik qyzmet kórsetiledi, olardyń 99 paıyzy onlaın formatta júzege asyrylady. 2027 jylǵa qaraı nysandardyń 50 paıyzy tsıfrlyq monıtorıngpen qamtylyp, salanyń negizgi protsesteri avtomattandyrylatyn bolady. Eski rásimderdiń zamanaýı tehnologııalarmen almastyrylýy - reınjınırıngtiń bir mysaly. Jańa sheshimder adamı faktordy azaıtyp, dáldik pen qaýipsizdikti arttyrady, - dedi J. Mádıev.
Onyń aıtýynsha, qazirgi kezde elektr berý jelilerin tekserý joǵary sapadaǵy beınekameralarmen jáne arnaıy quraldarmen jabdyqtalǵan drondar arqyly júzege asyrylady. Olar symdardyń shamadan tys qyzýyn, oqshaýlanýyn jáne tirekterdiń zaqymdanýyn anyqtaıdy. Jınalǵan derekter jasandy ıntellektisi bar defektoskopııa júıesimen óńdeledi, ol aqaýlardy 98 paıyz dáldikpen tanyp otyrady.
- Bul qyzmetkerler úshin táýekelderdi azaıtady, apattar sanyn jáne energııa shyǵynyn tómendetedi. Joba pılottyq rejımde iske asyrylýda, al 2027 jylǵa qaraı ony el aýmaǵy boıynsha jappaı engizý josparlanǵan. Potsesterge reınjınırıng júrgizýdiń taǵy bir mysaly — jylý energetıkasyndaǵy dıagnostıka protsesterin tsıfrlandyrý. Burynǵy sheshimder qolma-qol qabyldanatyn, bul ýaqyt pen shyǵyndardyń artýyna ákelip soǵady. Tsıfrlyq transformatsııa aıasynda kóptegen datchıkteri bar qubyrlardy dıagnostıkalaý boıynsha robottandyrylǵan keshen engizilip jatyr. Robot qubyrlardyń ishinde qozǵalyp, jeliniń úsh ólshemdi (3D) modelin jasaıdy jáne aqaý bolýy múmkin táýekeldi ýchaskelerdi anyqtaıdy. Bul óz kezeginde jóndeý jumystaryn dál josparlaýǵa múmkindik beredi. Qazir bul sheshim Shymkent qalasynda pılottyq rejımde synaqtan ótip jatyr, sodan keıin jylý jelilerin keń aýqymda reınjınırıngteý bastalady. Mundaı tásil shyǵyndardy azaıtady, jóndeý jumystaryn jyldamdatady jáne júıelerdiń senimdiligin arttyrady, - dedi mınıstr.
Budan buryn habarlanǵandaı, «KEGOC» AQ Basqarma tóraǵasy Nábı Aıtjanov Biryńǵaı elektr energetıkalyq júıesi aıasynda iske asyrylyp jatqan jobalarǵa túsinik berdi.