Jasandy ıntellekt dýblıaj salasyna qaýip tóndirip tur
ASTANA. KAZINFORM – Frantsııada tanymal akter, Ben Afflek pen Hoakın Fenıkstiń daýysyn dybystaǵan Borıs Relınger dýblıaj salasyn jasandy ıntellekten qorǵaýǵa shaqyryp otyr, dep habarlaıdy Reuters agenttigi.
Onyń aıtýynsha, bul salada júzdegen kásibı maman eńbek etip jatqanymen, JI tehnologııalary olardyń jumysyna naqty qaýip tóndirýde.
«Men óz daýysymdy JI áli almastyrmaǵanyna qaramastan, qaýip baryn sezemin», – dedi akter Reuters-ke bergen suhbatynda.
Ol adamdar jasaǵan dýblıajdy qorǵaýǵa baǵyttalǵan frantsýz bastamasy – TouchePasMaVF qozǵalysyna qatysyp júr.
Akterdiń aıtýynsha, dýblıaj – tek bir daýystyń jumysy emes, bul salada akterler, aýdarmashylar, rejısserler, dıalog beıimdeýshileri men dybys ınjenerleri eńbek etedi. Olardyń bári kórermenge ekrandaǵy akter óz tilinde sóılep turǵandaı áser qaldyrý úshin jumys isteıdi.
Netflix sekildi strımıngtik platformalar «Kalmar oıyny» men «Lıýpen» sııaqty hıt týyndylardy nasıhattaý úshin dýblıajdy keńinen qoldanýda. Bul – salanyń damýyna úlken serpin bergen.
GWI zertteý kompanııasynyń dereginshe, Germanııa, Frantsııa, Italııa jáne Ulybrıtanııadaǵy kórermenderdiń 43 paıyzy dýblıajdy sýbtıtrlerge qaraǵanda artyq kóredi.
Business Research Insights málimeti boıynsha, 2025 jyly dýblıaj naryǵynyń kólemi 4,3 mıllıard dollarǵa jetedi, al 2033 jylǵa qaraı 7,6 mıllıard dollarǵa deıin ulǵaıýy múmkin.
Bul ósim jańa tehnologııalyq sheshimderge degen qyzyǵýshylyqty arttyra tústi. Degenmen, jasandy ıntellekt kómegimen jasalǵan daýystar barǵan saıyn shynaıy ári qoljetimdi bola bastaǵan kezde, Eýropadaǵy dýblıaj akterleriniń qaýymdastyqtary Eýroodaqtan salany qorǵaýǵa baǵyttalǵan qatań retteýler engizýdi talap etip otyr. Olar dýblıaj sapasy men avtorlyq quqyqty qorǵaýmen qatar, akterlerdiń daýystyq arhıvteriniń ruqsatsyz paıdalanylýyna da alańdaýshylyq bildirýde.
Kınoındýstrııada tehnologııalarǵa qatysty alańdaýshylyq burynnan bar. Gollıvýdta jasandy ıntellekt 2023 jyly negizgi taqyryptardyń birine aınalyp, osyǵan baılanysty bolǵan ereýilderden keıin tehnologııany qoldanýǵa shekteý engizilgen bolatyn.
Aıta keteıik, AQSh pen Qytaı jasandy ıntellekt salasynda kóshbasshy atandy.