Jasandy ıntellekt demokratııaǵa tóngen qaýip pe
LONDON. KAZINFORM — Ulybrıtanııa bıligi osy jyldyń ekinshi jartysyna josparlanǵan saılaýdyń ádil ótýine jasandy ıntellekt keri yqpal etedi dep qaýiptenedi. Óıtkeni sońǵy ýaqytta saıasatkerlerdiń jalǵan vıdeolary men aýdıo jazbalary jelide qaptap ketken. Tehnologııalyq kompanııalar men úkimet birlesip shara qoldanbasa, feıkter túrli shıelenisterge alyp kelýi múmkin, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.
Nıeti qara memleketterdiń atynan áreket etetin qylmyskerler jasandy ıntellekt kómegimen saılaý nátıjelerin burmalaýy yqtımal, dep málimdedi Іshki ister mınıstri.
Kremnıı alqabynyń basshylarymen kezdesý kezinde Djeıms Kleverlı saıası naýqannyń ótýine jyldam damyǵan tehnologııalardyń kesiri tııý yqtımal dedi.
«Árıne, jasandy ıntellektiń artyqshylyqtarymen qatar, kemshilikteri de bar. Sondyqtan yqtımaldy qaýip-qaterdiń aldyn alý mańyzdy. Ónimdilikti arttyrý úshin tehnologııalyq kompanııalar Ulybrıtanııa úkimetimen yntymaqtyqta jumys isteıdi degen úmittemin», — deıdi Ulybrıtanııa Іshki ister mınıstri Djeıms Kleverlı.
Osy jyly Ulybrıtanııa, AQSh jáne Úndistan sııaqty kóptegen elde saılaý ótip, shamamen 2 mlrd adam daýys beredi degen boljam bar.
«Ras-ótirigin ajyratý qıyn vıdeo jáne aýdıo materıaldardyń maqsaty — eldegi demokratııalyq úderistirge nuqsan keltirý», - deıdi saıasatker.
Ótken jyly Leıborıster partııasynyń kóshbasshysy Kır Starmerdiń áriptesterine aıqaılap, beıádep sózder aıtyp jatqany áleýmettik jelilerde tarady.
Keıin bul — jasandy ıntellekt jasaǵan jalǵan aýdıojazba ekendigi málim boldy. London meri Sadık Hannyń da daýsy qaqtyǵystarǵa ulasýy múmkin daý-damaı týǵyza jazdady.
Polıtsııa aýdıojazbany zerttep, «qylmystyq quqyq buzýshylyq emes» degen qorytyndyǵa keldi. Sarapshylar dıpfeıkpen kúres júrgizilmese, demokratııaǵa qaýip tónedi dep esepteıdi.
«Dıpfeıkti anyqtaý mehanızmderi damyp jatyr. Mysaly, Intel kompanııasy teriniń astyndaǵy qan aınalymyn zertteý arqyly jalǵan vıdeolardy tabatyn tehnologııa oılap tapty. Biraq olar jetildirilgen saıyn jasandy ıntellekt te tez damyp keledi jáne burynǵydan da sapaly kontent usynýda. Ásirese, aýdıojazbanyń ras-ótirigin áshkereleý qıynǵa túsýde», — deıdi Century Tech kompanııasynyń bas dırektory Prııa Lakhanı.
Jaqynda jahandyq tehnologııalyq kompanııalar jasandy ıntellekten keletin qaýiptiń aldyn alý úshin «aqylǵa qonymdy qaýipsizdik sharalaryn» qoldaný týraly erikti kelisimge qol qoıdy.
Olar óz ónimderin zertteýge ruqsat berýge jáne bul salany birlesip basqarýǵa kelisti. «Jasandy ıntellektiń saılaýǵa yqpaly ózimizdi de qatty alańdatady» deıdi osy saladaǵy eń tanymal tulǵa.
«Indýstrııa men úkimetter birlesip ári jyldam áreket ete alady degen úmittemiz. Biz qoldanatyn qural jetkilikti. Bul baǵytta kóp nárse isteı alamyz jáne istep jatyrmyz da. Máselen, ChatGPT bas tartatyn tapsyrmalar bar. Qadaǵalaý saıasatyn ustana otyryp, jalǵan jańalyqtardy jasap jatqan adamdy anyqtaı alamyz», — deıdi OpenAI kompanııasynyń bas dırektory Semıýel Altman.
Biraq barlyǵynyń oıy bir jerden shyǵady: eshbir kompanııa, úkimet nemese azamattyq qoǵam uıymy bul tehnologııanyń yqtımaldy qaýpimen jeke-dara jáne tolyqqandy kúrese almaıdy. Sondyqtan adamdar synı paıymdaı bilý qasıetinen eshqashan arylmaýym kerek.
«Jasandy ıntellekten qorqýǵa esh sebep joq. Oılaı bilý qasıetimizden ada bolmasaq boldy. Biraq eger siz faktilerdi pikirlerden ajyrata almasańyz jáne ChatGPT nusqaýlaryn shartsyz oryndasańyz, qaýipti aımaqqa kiresiz», — deıdi Frantsııadaǵy Ekonomıkalyq áriptestik jáne damý uıymy departamentiniń dırektory Andreas Shleıher.
Qaýeset pen ósek-aıańnan bólek jelidegi aqparatty da saralaı bilý qajet.
Ǵalamtordaǵy dúnıelerdi taldaı bilýge balalardy ǵana úıretip qoımaı, eresekterdi de tartý kerek deıdi, sarapshylar.
