Jasandy ıntellekt Býrabaıdaǵy tórt órttiń aldyn alýǵa kómektesti
ASTANA.KAZINFORM — Órt qaýpi kezeńi bastalǵaly beri Býrabaı memlekettik ulttyq tabıǵı parki aýmaǵynda Smart órtti erte anyqtaý júıesiniń kómegimen tórt órt oshaǵy der kezinde anyqtalyp, joıyldy. «Býrabaı» memlekettik ulttyq tabıǵı parki málim etti.
Nátıjesinde órttiń orman qorynyń edáýir aýmaǵyna taralýyna jol berilmedi.
— Smart júıesi ulttyq parktiń Jedel basqarý ortalyǵymen biriktirilgen jáne táýlik boıy aýmaqqa monıtorıng júrgizedi. Órt belgileri anyqtalǵan jaǵdaıda aqparat avtomatty túrde kezekshi qyzmetterge jiberiledi. Bul áreket etý ýaqytyn aıtarlyqtaı qysqartyp, kúshter men quraldardy oqıǵa ornyna jedel baǵyttaýǵa múmkindik beredi, — delingen habarlamada.
Órt qaýipti maýsym bastalǵaly beri júıe tórt órt oqıǵasyn tirkedi. Barlyq jaǵdaıda órt oshaqtary bastapqy kezeńinde anyqtalyp, jedel túrde sóndirildi.
— Júıeniń tıimdiligi 22 maýsym kúni taǵy bir márte dáleldendi. Saǵat 15:10–da Býrabaı memlekettik ulttyq tabıǵı parkiniń Bulandy ormanshylyǵynyń 36-kvartalynda naızaǵaı razrıadynyń áserinen tutanǵan órt tirkeldi. Órttiń jalpy aýdany 0,5 gektardy qurady, onyń ishinde 0,01 gektary ormanmen kómkerilgen aýmaqqa, al 0,49 gektary ormansyz jerlerge tıesili boldy, — dep habarlady tabıǵı parkten.
Órt oshaǵynyń jedel anyqtalýynyń arqasynda ony sóndirý jumystary anyqtalǵannan keıin nebári 12 mınýt ótken soń bastaldy. Taǵy 25 mınýttan keıin órt oqshaýlanyp, jalynnyń odan ári taralýynyń aldyn alý múmkin boldy.
Órtti sóndirý jumystaryna barlyǵy 26 adam jumyldyryldy. Olardyń qatarynda Býrabaı memlekettik ulttyq tabıǵı parkiniń 20 qyzmetkeri, «QazAvıaOrmanQorǵaý» RMKK-nyń eki qyzmetkeri jáne Birjan sal aýdanynyń tótenshe jaǵdaılar bóliminiń tórt qyzmetkeri boldy. Órtti sóndirýge tórt birlik tehnıka, onyń ishinde órt sóndirý avtokólikteri, shaǵyn orman patrýldik kesheni jáne áýe kemesi tartyldy.
Ulttyq park mamandarynyń aıtýynsha, zamanaýı tehnologııalar orman ekojúıelerin qorǵaý júıesiniń mańyzdy quramdas bóligine aınalýda. Órt qaýpiniń joǵary deńgeıi jaǵdaıynda órt oshaqtaryn der kezinde anyqtaý iri orman órtteriniń týyndaýyn boldyrmaýǵa jáne qorshaǵan ortaǵa keletin zııandy barynsha azaıtýǵa múmkindik beredi.
Qazirgi ýaqytta Býrabaı memlekettik ulttyq tabıǵı parki aýmaǵynda órt qaýpiniń joǵary — besinshi klasy saqtalýda. Osyǵan baılanysty kelýshilerden órt qaýipsizdigi talaptaryn qatań saqtaý, arnaıy belgilenbegen oryndarda ot jaqpaý jáne Býrabaıdyń biregeı tabıǵatyna uqypty qaraý suralady.
Aıta keteıik, bir aptada «Semeı ormanynda» 15 órt oshaǵy anyqtalyp, der kezinde joıyldy.
