Jasandy ıntellekt bolashaqta repetıtorlardy almastyra ala ma

ASTANA. KAZINFORM — Jasandy ıntellekt kóptegen adamdardyń kúndelikti ómiriniń ajyramas bóligine aınaldy. ChatGPT, Gemini nemese Copilot sııaqty iri tildik modelder (LLM) adamdarǵa hattar men kýrstyq jumystar jazýǵa kómektesedi, demalys kezindegi ekskýrsııalarǵa keńes beredi nemese kez kelgen taqyryp boıynsha suraqtarǵa jaýap beredi, dep jazdy Azertadj. 

Germanııadaǵy ıÝlıı jáne Maksımılıan atyndaǵy Vıýrtsbýrg ýnıversıtetiniń zertteýshiler toby jasandy ıntellekt jaratylystaný ǵylymdary stýdentterin táýelsiz repetıtor retinde qandaı dárejede qoldaı alatynyn zerttedi.

Fızıkalyq hımııa kafedrasynyń zertteý toby buryn negizinen nano materıaldardy spektroskopııalyq zertteýmen aınalysqan. Endi olar qazirgi LLM modelderiniń termodınamıkany qanshalyqty túsinetinin tekseretin qural jasap shyǵardy. Bul qural tek qarapaıym faktologııalyq bilimmen shektelmeı, tereń túsinikti baǵalaýǵa baǵyttalǵan.

UTQA (Undergraduate Thermodynamics Question Answering) dep atalatyn bul qural ashyq qoljetimdi jáne oqytýshylar men zertteýshilerge tildik modelderdi obektıvti jáne mazmundy baǵalaýǵa, sondaı-aq olardyń damý deńgeıin ólsheýge arnalǵan.

— Bolashaqta jasandy ıntellekt oqytýda bizdiń táýelsiz seriktesimizge aınalady dep úmittenemiz. Mysaly, árbir stýdenttiń qajettiligine jekeleı jaýap beretin, dáristerge daıyndalý men ony túsinýge kómektesetin bilikti chat-bottar túrinde, — deıdi joba jetekshisi professor Tobıas Hertel.

Herteldiń komandasy 2023 jylǵy qysqy semestrden bastap, 150-den astam stýdentke termodınamıka dáristerinde LLM-di aptalyq bilim tekserý quraly retinde paıdalanyp keledi. ChatGPT-3.5 jáne ChatGPT-4 sııaqty modelder myqty jaqtaryn kórsetkenimen, anyq álsiz tustary da bolǵan.

Osyǵan baılanysty arnaıy pándik test jasaý qajettiligi týyndaǵan.

— UTQA — bul negizgi termodınamıka kýrsynyń 50 kúrdeli tapsyrmasynan turatyn test. Bir ǵana durys jaýaby bar suraqtar berilgen. Tapsyrmalardyń úshten ekisi mátindik sıpatta, al úshten biri — dıagramma men syzbalardan turady. Bul dıdaktıkalyq jattyǵýlarda jıi kezdesetin format, — dep túsindiredi Hertel.

Maqsat tek faktologııalyq bilim men anyqtamalardy tekserý ǵana emes, sonymen qatar tildik modelderdiń ártúrli shekteý jaǵdaılaryn baılanystyryp, kúrdeli protsester tizbegin túsine alý qabiletin baǵalaý bolǵan.

— Іs júzinde bul LLM modelderi oqytýda, qadaǵalaýmen bolsa da, tipti onsyz da, qazirdiń ózinde paıdaly bola alatynyn bildiredi. Alaıda, olardy tolyqqandy táýelsiz repetıtor retinde paıdalaný úshin áli jetkiliksiz. Sonymen birge sońǵy eki jylda úlken jetistikterge kýá boldyq. Eger damý úderisi kúrt toqtap qalmasa, jaqyn bolashaqta bizdiń pán boıynsha assıstent-oqytýshy deńgeıine jetý de múmkin bolady», — dep qorytyndylady joba jetekshisi.

Al Memleket basshysynyń Joldaýynda Qazaqstanda jasandy ıntellekt jáne tsıfrlyq damý mınıstrligi qurylatyny aıtyldy.